Հայաստանի Հանրապետությունը բազմիցս հայտարարել է, որ շահագրգռված է Ադրբեջանի Հանրապետության հետ պետական սահմանի սահմանազատման գործընթացով: Այդ մասին լրագրողների հետ զրույցում ասաց ՀՀ արտաքին գործերի նախարար Արարատ Միրզոյանը՝ հիշեցնելով Սոչիում Հայաստանի, Ռուսաստանի և Ադրբեջանի ղեկավարների կողմից ընդունված և եռակողմ հայտարարությամբ ամրագրված պայմանավորվածությունը այդ հարցի վերաբերյալ:
2021 թ. նոյեմբերի 26-ին Սոչիում ընդունված Փաշինյան-Պուտին-Ալիև եռակողմ հայտարարությամբ երեք ղեկավարները պայմանավորվել էին քայլեր ձեռնարկել հայ-ադրբեջանական սահմանին կայունության և անվտանգության մակարդակը բարձրացնելու նպատակով և «գործընթացը տանել» Հայաստանի և Ադրբեջանի միջև պետական սահմանի դելիմիտացիայի և դեմարկացիայի հարցերով երկկողմ հանձնաժողովի ստեղծման ուղղությամբ:
«Մենք 100 տոկոսով հավատարիմ ենք այս հայտարարությանը և այս սկզբունքին, այս պարտավորությանը, որ ստանձնել ենք», – շեշտեց Արարատ Միրզոյանը:
Արտգործնախարարը նաև հաղորդեց, որ Երևանը այժմ ադրբեջանական և ռուսական կողմերի հետ քննարկում է անվտանգության այն միջոցները, որոնք, հայկական կողմի կարծիքով, անվտանգության և կայունության մեխանիզմներ կստեղծեն սահմանագծին: Հայկական կողմն այդ հարցի առնչությամբ տարբեր առաջարկներ է ներկայացրել, որոնց Բաքուն բացասաբար է արձագանքել, սակայն դա, նախարարի խոսքով, շարունակական գործընթաց է:
