Քաջարանի թիվ 1 և թիվ 2 միջնակարգ դպրոցներում բացվեցին էկոլոգիայի առաջին լաբորատորիաները։ Դրանք իրենց տեսակի մեջ միակն են թե՜ Հայաստանում, թե՜ ողջ տարածաշրջանում։ Նախաձեռնությունը Քաջարանի քաղաքապետարանինն էր, որին աջակցել են «Այբ» կրթական հիմնադրամը, ԵԱՀԿ երեւանյան գրասենյակը, բնապահպանական մի շարք կազմակերպություններ: Լաբորատորիաները, որոնք հագեցած են գերժամանակակից սարքերով ու նյութերով, հնարավորություն կտան երեխաներին ուսումնասիրելու հողի, օդի, ջրի աղտոտվածության աստիճանը, կատարել մի շարք փորձեր: Էլեկտրոնային գրատախտակները հնարավորություն կտան դպրոցականներին տարածաչափական բոլոր հարթությունները օգտագործել գծագրեր կամ գծապատկերներ ստանալու համար։ Իսկ քիմիական լուծույթների, նաեւ տարատեսակ չափիչ սարքերի միջոցով ավելի լավ կճանաչեն իրենց շրջապատող աշխարհը։ Տեղական բյուջեից 20 մլն դրամ է ներդրվել ծրագիրն իրականացնելու համար։«Այբ» կրթական հիմադրամն էլ իրականացրել է լաբորատորիաների ամբողջական նախագծումը եւ հեղինակային վերահսկողությունը ծրագրի կատարման ողջ ընթացքում: Արդեն երկրորդ տարին է Քաջարանի դպրոցներում ուսուցանվում է «Քաջարան. բնություն եւ էկոլոգիա» առարկան, որի դասավանդմանը շատ կօգնի նորաբաց լաբորատորիաները: ՀՀ կրթության եւ գիտության փոխնախարար Մանուկ Մկրտչյանը, մասնակցելով թվայնացված տեղեկատվական ծրագրերով թիվ 1 դպրոցում անցկացրած բաց դասին, ասաց, որ հնարավոր է ԿԳ նախարարի թույլտվությամբ հանրապետության այլ դպրոցների մասնագետների էքսկուրսիաներ կազմակերպվեն Քաջարան` տեղում ծանոթանալու լաբորատորիաների աշխատանքին: Սյունիքի մարզպետ Սուրիկ Խաչատրյանն էլ խոստացավ նոր սարքավորումների ձեռք բերման հարցում տրամադրել անհրաժեշտ գումարը: Մարզպետը նաև ցանկություն հայտնեց, որ սարքավորումները թանգարանային նմուշ չդառնան, այլ ծառայեն իրենց նպատակին։
