ՀՀ արդարադատության նախարարությունը իրավական ակտերի նախագծերի հրապարակման միասնական կայքում օրենքի նախագիծ է ներկայացրել, որով փոփոխություններ և լրացումներ են նախատեսվում «Կուսակցությունների մասին» Սահմանադրական օրենքում, «Կոռուպցիայի կանխարգելման հանձնաժողովի մասին» օրենքում և հարակից օրենքներում: Նախագծերի այս փաթեթով նախատեսվում է ապահովել Կոռուպցիայի կանխարգելման հանձնաժողովին վերապահված՝ կուսակցությունների ֆինանսական գործունեության վերահսկողության և կուսակցությունների հայտարարատու պաշտոնատար անձանց հայտարարագրերի ստուգման գործառույթների պատշաճ և արդյունավետ իրականացումը։ Նախագծով առաջարկվում է նաև պարզեցնել աուդիտի կազմակերպման նպատակով անհրաժեշտ տեղեկությունները Կոռուպցիայի կանխարգելման հանձնաժողովին տրամադրելու ընթացակարգը:
Նման իրավակարգավորման հիման վրա կուսակցությունները յուրաքանչյուր տարվա մինչև հունվարի 31-ը օրենքի ուժով հանձնաժողովին կներկայացնեն սահմանված տեղեկությունները՝ սահմանված ձևաթղթով։ Վերը նշված նորմի պահանջները խախտելու համար նախատեսվել է վարչական պատասխանատվություն։ Օրենքով նվազեցվելու է պետական ֆինանսավորումը, եթե կուսակցությունն իր գույքի վարձակալությունից, բանկային ավանդից, իր կողմից հիմնադրված զանգվածային լրատվության միջոցի կամ հրատարակչական կազմակերպության գործունեությունից ստանում է եկամուտներ,որոնց չափը պետական ֆինանսավորման ծավալը գերազանցելու դեպքում նախատեսվում է պետական ֆինանսավորման դադարեցում։ Արդյոք կարո՞ղ ենք սպասել արդյունավետություն այս գործընթացից և ի՞նչ խնդիրներ կան:
«Իրազեկ քաղաքացիներ» ՀԿ-ի ղեկավար, իրավապաշտպան Դանիել Իոննիսյանն ասաց, որ, քաջատեղյակ լինելով նախագծից, ակտիվորեն մասնակցելով քննարկումներին, այդ թվում՝ վարչապետի ներկայությամբ, որոշակի խնդիրներ են նկատել, մասնավորապես նախագծի գործարկման ժամկետների առումով, արդյունավետության բարձրացման հարցերի հետ կապված: Հիմնական խնդիրն, ըստ Իոննիսյանի, այն է՝ արդյոք ներկայումս Կոռուպցիայի կանխարգելման հանձնաժողովը պատրա՞ստ է իրականացնել կուսակցությունների աուդիտը արդյունավետ կերպով, եթե այս պահին հանձնաժողովի կարողությունները չեն բավականացնում. չունի անգամ աուդիտ անցկացնելու համար համապատասխան կադրեր և տարվա ընթացքում չի կարողացել հասցնել անհրաժեշտ մակարդակով աշխատանքներ տանել: «Այսպիսով՝մենք կողմ ենք գաղափարին, բայց բարձրացնում ենք հարցը՝ մեզ պետք է արագ, բայց արդյունավետություն չունեցող գործընթա՞ց, թե՞ մի քիչ ուշ ներդրվող ու որակյալ»,-ընդգծում է իրավապաշտպանը:
Մենք անդրադարձանք նաև այն հարցին, թե ինչպես կմեկնաբանի, որ խորհրդարանի ընդդիմադիր խմբակցությունների վեց պատգամավորներ, ովքեր անցնում են ապօրինի գույքի բռնագանձման օրենքի ներքո, անթաքույց, առանց որևէ մտավախության բացահայտ ևս մեկ անգամ ու լրջորեն վարկաբեկվելուց, պայքար են սկսել օրենքի դեմ՝բողոքարկելով այն ՍԴ-ում, ի պատասխան Իոննիսյանն ասաց, որ իրենք բնույթով այնպիսին են, որ չեն կարող ցանկանալ կոռուպցիայի վերացում,ժողովրդավարություն: Նրանց նպատակն այլ է՝ պաշտպանել թալանի արդյունքում ձեռքբերած ունեցվածքը, ուրիշ բանի համար չեն անցել խորհրդարան:
Իրավապաշտպանը չցանկացավ նշել կոնկրետ անուններ, սակայն կարծիք հայտնեց, որ բոլորի համար հիմնականում պարզ է՝ ովքեր կարող են անցնել օրենքով և նշելու կարիք չկա: «Նրանցից մեկի մասին արդեն դատախազությունը հրապարակային անդրադարձել և նշվել է, որ Ապօրինի ծագում ունեցող գույքի բռնագանձման գործընթացի շրջանակում պաշտպանության նախկին նախարար, Ազգային ժողովի ընդդիմադիր «Հայաստան» խմբակցության ղեկավար Սեյրան Օհանյանը ներկայացել է դատախազություն»։ Հարցին, թե ի՞նչ ակնկալիքներ ունի՝ Սահմանադրական դատարանն ինչպիսի՞ վճիռ կկայացնի, մեր զրուցաիցն ասաց՝ հաշվի առնելով, որ ՍԴ-ի դատավորներից մեկը՝ Հրայր Թովմասյանը, ևս անցնում է այդ օրենքով, դժվար է միանշանակ լավատեսական կարծիք ասել:«Ես հուսով եմ գոնե Հ. Թովմասյանին չեն թողնի մասնակից դառնալ այդ բողոքարկման վերաբերյալ որոշման կայացմանը: Իսկ ընդհանրապես ես ՍԴ-ից առանձնապես դրական ակնկալիքներ չունեմ»,-ամփոփեց իրավապաշտպանը:
