Հունվարի 31-ին, Արագածոտնի մարզի Սասունիկ համայնքում տեղի ունեցավ ՌԴ-ում ՀՀ աշխատանքային միգրանտների շահերի պաշտպանությանն ուղղված խորհրդատվական հանդիպում համայնքի աշխատանքային միգրանտների, նրանց ընտանիքների անդամների, ինչպես նաև նրանց խնդիրների լուսաբանման համար համայնք այցելած լրագրողների հետ։ «Հայկական Կարիտաս» բարեսիրական ՀԿ-ի «Ղրղզստանում, Հայաստանում եւ Ռուսաստանում գործընկերության ամրապնդման միջոցով աշխատանքային միգրանտների պաշտպանության խթանում» ծրագրի միգրացիոն փորձագետ Տաթևիկ Բեժանյանը և ծրագրի ՌԴ գործընկեր «Թոնգ Ջահոնի» կազմակերպության նախագահ Վալենտինա Չուպիկը հանդիպմանը ներկա աշխատանքային միգրանտներին և լրագրողներին ներկայացրեցին ՌԴ միգրացիոն օրենսդրության վերջին փոփոխությունները և դրանց ազդեցությունը միգրանտների, նրանց ընտանիքի անդամների, միգրանտ ուղարկող երկրների, հատկապես ԵԱՏՄ անդամ երկրների վրա:
Տաթևիկ Բեժանյանը ներկայացրեց ՌԴ միգրացիոն նոր օրենսդրությունը, մասնավորապես շեշտեց, որ 2021թ. -ի դեկտեմբերի 29-ից ուժի մեջ մտած փոփոխությունները հակասում են ԵԱՏՄ պայմանագրի 96 – 98 հոդվածներին, որտեղ նշված է, որ միայն աշխատանքային կամ քաղ.իրավական պայմանագրի առկայությունը բավարար է, որ ԵԱՏՄ անդամ երկրների քաղաքացիները անարգել աշխատանքային գործունեություն ծավալեն ՌԴ ողջ տարածքում և աշխատանքային պայմանագրի ժամկետով երկարաձգեն իրենց միգրացիոն հաշվառումը: Նոր փոփոխությունների արդյունքում միգրանտները, այդ թվում ԵԱՏՄ անդամ երկրների քաղաքացի միգրանտները, կարող են միգրացիոն հաշվառումը երկարաձգել միայն 3 ամիս ժամկետով, այն տարածքում, որտեղ հանձնել են 9 ինը( 8+ քովիդ) ինֆեկցիոն հիվանդությունների գծով անալիզներ և անցել են նարկոլոգի խորհրդատվություն, հակառակ դեպքում նրանք ստիպված են կլինեն կամ լքել ՌԴ տարածքը կամ դառնալ անօրինական միգրանտ: ՌԴ տարածքում այլ վայր տեղափոխվելու պարագայում, ստիպված են նորից հանձնել նույն անալիզները և երկարաձգել միգրացիոն հաշվառումը 7/յոթ աշխատանքային օրվա ընթացքում, ինչը իրականում անհնար է, քանի որ անալիզները հանձնելու համար ժամկետ է սահմանվում 5-18 աշխատաքային օր, իսկ միգրացիոն հաշվառումը երկարաձգելը ևս 5 աշխատանքային օր է տևում, ինչի հետևանքով գրեթե անհնար է դառնում ՌԴ-ում օրինական գտնվելը, իսկ ԵԱՏՄ անդամ երկրների քաղաքացիներին սահմանափակում են։ Միգրացիոն հաշվառման երկարաձգման համար այլևս ոչ թե աշխատանքային պայմանագիրն է հիմք, այլ ինֆեկցիոն հիվանդությունների համար հանձնած անալիզները:
Արդյունքում կամ պետք է փոփոխություն արվի ԵԱՏՄ պայմանագրում, կամ ԵԱՏՄ անդամ երկրների քաղաքացիների համար չեղարկվի օրենքի այս դրույթը:
Տ․ Բեժանյանը նշեց․ «Ես հակված եմ կարծելու, որ ԵԱՏՄ պայմանագիրը փոփոխության կենթարկվի, ինչի արդյունքում այն այլևս որևէ առավելություն չի նախատեսի մեր քաղաքացիների համար»:
Վալենտինա Չուպիկը ներկայացրեց արդեն ի հայտ եկած խնդիրները, օրենքի բացերն ու թերությունները, քայլերի այն հերթականությունը, որ պետք է իրականացնի միգրանտը մուտքի պահից սկսած: Նա նաև նշեց. « ՌԴ առողջապահության նախարարության 19.11.2011թ. ընդունված 1079 N որոշման համաձայն, որը փաստացի հրապարակվել է 23.12.2021թ., բոլոր միգրանտներն անխտիր (նաև կացության կարգավիճակ (ВНЖ) և ժամանակավոր բնակության թույլտվություն (РВП) ունեցողները, ովքեր չունեն մշտական գրանցում, այլ ունեն ժամանակավոր գրանցում), պարտավոր են վերը նշված 9 ինֆեկցիոն հիվանդությունների գծով անալիզները հանձնել 3 ամիսը մեկ, մուտքի պահից սկսած 30-օրյա ժամկետում, իսկ ՌԴ տարածքում մի վայրից մեկ այլ վայր տեղափոխվելու դեպքում 7-օրյա ժամկետում: Մատնահետք պետք է հանձնել 1 անգամ, 2 ձեռքի բոլոր մատների և 2 ձեռքի ափերի համար: Սակայն ոչ բոլոր կենտրոններն ունեն ափը սքան անող սարքերը, ինչը ևս անհնարին է դարձնում այս գործընթացը: Մյուս կողմից բժշկական անալիզներ հանձնելը վճարովի ծառայություն է և գինը կազմում է 5300 ռուբլի աշխատանքային միգրանտների համար, 6900 ռուբլի՝ երեխաների համար և 16500 ռուբլի ուսանողների համար և այս գումարները պետք է վճարել յուրաքանչուր 3 ամիսը մեկ` անալիզները հանձնելիս»:
