«Առաջին լրատվական»-ի հարցերին պատասխանել է Էկոնոմիկայի նախկին նախարար Արմեն Եղիազարյանը
Հրապարակվել է 2021 թվականի տնտեսական ակտիվության ցուցանիշը, որը կազմել է 5,8 տոկոս: Ինչպես եք գնահատում այն, սա սպասվածից ավելի շատ է, թե քիչ:
Նայած ինչ էինք սպասում: Օրինակ, Համաշխարհային բանկը կանխատեսել է մոտ 6 տոկոս:
Աճի նման ցուցանիշը բարձր է, քան տարեսկզբի կանխատեսումը, բայց ավելի փոքր է, քան երկրորդ կիսամյակի կանխատեսումը: Ինչո՞վ եք սա բացատրում:
Բարդ է ասել, դա լավ է, թե վատ: Ընդհանուր առմամբ, ցուցանիշները նորմալ են, կարող էր ավելի վատ լինել: Պետք է հասկանալ, թե ինչի հաշվի է այդ աճը, ինչն է զարգացել, ինչը չի զարգացել և այլն: Այս ցուցանիշը երևալի լավ չի, բայց վատ էլ չի:
Գյուղատնտեսության ոլորտում որոշակի անկում ունենք: Սա մտահոգիչ չէ՞:
Գյուղատնտեսության ոլորտում այդ անկումն արդեն 2016 թվականից կա: Գյուղատնտեսությունում շատ լուրջ պրոբլեմ ունենք:
Ի՞նչ քայլեր պետք է արվեն դա կանխելու համար: Նշվում է, որ գոյւղոլորտում Հայաստանն ապագա ունի, բայց չի կարողանում իր ներուժը ճիշտ օգտագործել:
Գյուղատնտեսության ոլորտում խնդիրն այն է, որ տնտեսության զարգացումը բերում է նրան, որ գյուղատնտեսության տեսակարար կշիռը կրճատվում է: Բայց այդպես չպետք է լիներ, կամ պետք է գար զրոյի վրա կանգներ, կամ մի քիչ աճեր: Այդտեղ լուրջ խնդիր կա, ընդհանրապես ամբողջ սուբսիդավորման համակարգը պետք է փոխել. Ամբողջ քաղաքականությունը պետք է փոխվի, պետք է խրախուսվի կոմերցիոն գյուղատնտեսությունը, օժանակությունն այնպես պետք է լինի, որ ով փող է աշխատում, նա ստանա, ոչ թե բոլորը ստանան: Պետք է շատ լուրջ ուշադրություն դարձնենք գյուղատնտեսությանը:
Փոխարենը շինարարության ոլորտում աճ ունենք:
Շինարարության աճը նշանակում է, որ մարդիկ հույսեր են կապում էս երկրի հետ, որը վատ չի:
Արտահանման առաջանցիկ աճը ներմուծման նկատմամբ ինչի՞ մասին է խոսում:
Պետք է հասկանանք, թե ինչի հաշվին է այդ առաջանցիկ աճը, պետք է ոչ միայն ապրանքներին, այլ նաև ծառայություններին նայենք: Օրինակ, 2019 թվականին արտահանման մոտ 40 տոկոսը ծառայություն էր, 60 տոկոսը՝ արտադրություն: Այդ առումով 2020-ին ուժեղ ընկել էր ծառայությունների արտահանումը, որը պետք է ինչ-որ չափով վերականգնվի: Ընդհանրապես աշխարհն է վերականգնվում: Միացյալ Նահաների տնտեսությունն աճել է 5,5 տոկոսով, այդ երկիրը 40 տարի նման աճ չի ունեցել: Եթե ամբողջ աշխարհն աճում է, դա Հայաստանում էլ է արտահայտվում: Այնպես որ մոտ 5,5 տոկոս տնտեսական աճը, որ կգրանցվի 2021-ին, վատ արդյունք չէ: Մենք տեսնում ենք, որ կորոնավիրուսի սահմանափակումները կամաց-կամաց վերացնում են, իսկ դա տնտեսական աճի համար նպաստող գործոն է: Գների բավական բարձր աճը բացատրվում է երկու հանգամանքով. Մի մասը համաշխարհային փափուկ դրամավարկային քաղաքականության պատճառով է, իսկ երկրորդը այն է, որ լոգիստիկան է խախտվել: Այսինքն մարդիկ ընկել են կարանտինի տակ, արտադրանքը չեն թողարկել, աշխատող չկա և այլն:
