Փետրվարի 4-ին Պեկինում կմեկնարկի 24-րդ ձմեռային Օլիմպիական խաղերը։ Ձմեռային մարզաձևերի կարևորագույն փառատոնին Հայաստանը կներկայացնեն 6 մարզիկներ՝ դահուկավազորդներ Միքայել Միքայելյանը, Կատյա Գալստյանը, Անգելինա Մուրադյանը, լեռնադահուկորդ Հարություն Հարությունյանը ինչպես նաև գեղասահքի Թինա Կարապետյան -Սիմոն Սենեկալ պարային զույգը։ 2018 թվականին Հարավային Կորեայի Փյոնչհան քաղաքում տեղի ունեցած Օլիմպիադայում Հայաստանն ուներ ընդամենը 3 մասնակից դահուկորդներ՝ Միքայել Միքայելյանը, Կատյա Գալստյանը և լեռնադահուկորդ Աշոտ Կարապետյանը։ Փաստորեն, նախորդ Օլիմպիական խաղերի համեմատ Հայաստանի օլիմպիական հավաքականի կազմը կրկնապատկվել է։ Այնուամենայնիվ, մեր օլիմպիականներից Պեկինում լուրջ հաջողություններ անկնկալ չի կարելի։ Ինչ խոսք, որոշակի սպասելիքներ կան Միքայելյանից, ինչպես նաև Կարապետյան-Սենեկալ պարային զույգից, բայց․․․։ Նշենք, որ Ձմեռային օլիմպիական խաղերում հայաստանցի մարզիկները երբևէ մեդալ չեն նվաճել: Մրցանակային տեղերից վերջին 25 տարիներին անմասն են մնացել նաև հարևան բոլոր երկրների մարզիկները, ասել է թե ձմեռային մարզաձևերը մեր տարածաշրջանի համար չեն: Առաջիկա Օլիմպիական խաղերում Ադրբեջանը, որը հսկայական գումարներ է ներդնում սպորտում, կներկայանա ընդամենը երկու մարզիկով, որոնք սակայն ադրբեջանցիներ չեն:
Մասնավորապես, Պեկինում Ադրբեջանը ներկայացնելու են գեղասահորդներ Եկատերինա Ռյաբովան և Վլադիմիր Լիտվինցրև, որոնք ազգույթամբ ռուս են։ Նախորդ օլիմպիական խաղերում Ադրբետջանը կներկայացրել էր մեկ մարզիկ լեռնադահուկորդ Բրանխերը, որն ազգությամբ ավստրիացի է: Հիշենք, որ վերջին տասնամյակում Ադրբեջանի դրոշի ներքո Ամառային օլիմպիական խաղերում մեդալներ են նվաճել բազմաթիվ այսպես կոչված լեգեոնականներ: Ակնհայտ է, որ ցանկության դեպքում Ադրբեջանը Պեկինում կնարկայացներ ոչ թե 2, այլ, ասենք՝ 10 արտասահմանցի մարզիկներ, որոնք իրական պայքար կմղեին մեդալների համար: Իսկ 2 մարզիկ ադրբեջանցիները «վարձակալել» են ձևի համար, որպեսզի երկիրը ներկայացուցիչ ունենա մարզական փառատոնին:Հարևան Վրաստանը Օլիմպիական խաղերում ներկայացնելու են 9 մարզիկներ, որոնցից 3-ը ազգությամբ վրացի չեն։ Նախորդ օլիմպիական խաղերում Վրաստանը ներկայացել էր 4 մարզիկով, որոնցից սահնակորդ Գեորգի Սողոյանը մեր հայրենակիցն է։ Փաստորեն, մասնակիցների քանակով հայերը գերազանցում են թե՛ վրացիներին և թե՛ ադրբեջանցիներին: Ինչ վերաբերվում է Թուրքիային, ապա այս երկիրը Պեկինում կներկայանա 7 մարզիկով։
Իրանի օլիմպիական հավաքականն էլ բաղկացած է երեք մարզիկներից։ Ամեն դեպքում փաստենք, ինչպես տարածաշրջանի մյուս երկրները, այդեպս էլ մենք Ձմեռային խաղերին մասնակցում են կարևորը մասնակցությունն է կարգախոսով: Դրա համար կան օբյեկտիվ և սուբյեկտիվ պատճառներ: Օբյեկտիվ պատճառն այն է, որ մենք չունենք համապատասխան պայմաններ և չունենք մասնագետներ: Այս երկուսի համադրումը բերում է նրան, որ մենք պարզապես մասնակցում ենք խաղերին: Պետք է նշել նաև, որ մենք ձմեռային օլիմպիական խաղերին մասնակցում ենք վարկանիշով, ինչը նշանակում է, որ մասնակցում ենք մեր վաստակով: Այսօր պետք փաստենք, որ չունենք այն մասնագետները, ովքեր կարող են մրցունակ մարզիկների աճեցնել ։Պետք է ընդունենք նաև, որ ձմեռային մարզաձևերի վրա ներդրումներ կատարելն այսօր այնքան էլ պատեհ չէ, քանզի այսօր խնդիրներ ունեն նաև հենակետային մարզաձևերը: Միջազգային ասպարեզում մեր երկիրը հաջողության է հասնում մասնավորապես բռնցքամարտում, ըմբշամարտում և ծանրամարտում:
Հասարակության կողմից այնքան էլ չի ընկալվի, եթե այս մարզաձևերի հաշվին ավելի մեծ ներդրումներ կատարվեն ձմեռային մարզաձևերի վրա: Իսկապես ցավալի է, որ մեր պետությունը և որոշ անհատներ հնարավորություն ունեն զարգացնելու ընդամենը մի քանի մարզաձևեր:
