ՀԱՊԿ նախկին գլխավոր քարտուղար Նիկոլայ Բորդյուժան հայտարարել էր, որ գոյություն ունեն ՀԱՊԿ շրջանակներում Հայաստանին ժամանակակից սպառազինություններով և ռազմական տեխնիկայով զինելու ամբողջական ծրագրեր, որոնց էությունն այն է, որ ՀԱՊԿ անդամ պետությունները համաժամանակյա կերպով ապահովեն իրենց զինված ուժերն ու մյուս ուժային կառույցները նույնատիպ սպառազինությամբ, միևնույն մակարդակի համակարգերով և որ իր դաշնակիցներին ամենաժամանակակից զինատեսակները վաճառում է ներքին գներով։
Նախօրեին նաև պարզ դարձավ նաև, որ ՀՀ զինված ուժերի ավիացիան համալրվել է ժամանակակից, բազմաֆունկցիոնալ նոր ուղղաթիռներով, որոնք նախատեսված են դեսանտային, կրակային, տրանսպորտային և սանիտարական խնդիրներ կատարելու համար։ Արդյոք սա բավարա՞ր է հայտարարելու համար, որ Հայաստանը ապահովված է արդիական զենքով, և արդյոք սա խանդավառվելու առիթ է։
Այս առնչությամբ ռազմական փորձագետ Մհեր Հակոբյանը «առաջին լրատվական»-ի հետ զրույցում նշեց, որ այս փաստերից ինքն անձամբ առանձնապես չէր խանդավառվի, քանի որ նման հայտարարությունները ոչինչ չեն նշանակում. «Նման հայտարարություններն ամեն ինչ կարող են նշանակել՝ սկսած նրանից, որ ամեն ինչ լավ է, վերջացրած նրանով, որ ամեն ինչ վատ է: Նման պաշտոնյայի հայտարարությունից մենք ոչինչ էլ չենք կարող հասկանալ, թե իրականում ինչ է արվում»,-ասաց նա:
Հարցին, թե որքանով է ռուսական արդիական զենքը արդյունավետ, փորձագետը պատասխանեց. «Իրականում ռուսական զենքը վատը չի աշխարհում, բայց ավելի լավ կլիներ, ամեն դեպքում ավելի արևմտյան զենք»:
Նույն խնդրի առնչությամբ ԱԺ պաշտպանության և անվտանգության հարցերի հանձնաժողովի փորձագետ Արծրուն Հովհաննիսյանն «Առաջին լրատվական»-ի հետ զրույցում նշեց. «Մի քանի ուղղաթիռով խորքային բարեփոխումների մասին պետք չի մտածել: Սա փոքր քայլ է, իսկ բարեփոխումն այդ փոքր քայլերի ամբողջությունն է: Փոքր-փոքր, վաղը, մյուս օրը կդառնա մեծ: Շատ լավ եմ վերաբերվում ուղղաթիռներին, դրանք լավ ուղղաթիռներ են մեր խնդիրների համար: Մենք այդ ուղղաթիռների հին մոդելներն էինք շահագործել տարիներ շարունակ: Հիմա գոհ ենք, որովհետև դրանք շատ նպատակային են մեր տարածաշրջանի համար, մեր խնդիրների համար, բազմապրոֆիլ են, ավելի շատ տրանսպորտային պրոֆիլով»:
Անդրադառնալով Բորդյուժայի հայտարարությանը, Արծրուն Հովհաննիյանն ասաց. «Շատ ուրախ եմ և անձամբ սպասում եմ որպես հայ, որպես նախկին զինվորական, որ մեր զինված ուժերը համալրվեն հնարավորինս շատ և արդիական սպառազինությամբ: Ինչքան շատ, այնքան լավ: Մենք դրա կարիքն ունենք թե պատերազմի ընթացքում կորցրածը վերականգնելու իմաստով, թե նոր պատերազմի ժամանակ ի հայտ եղած թերությունները վերացնեելու առումով: Մեզ պետք է ժամանակակից սպառազինություն, որովհետև պատերազմներն առաջ են գնացել: Եթե Բորդյուժայի ասածը նշանակում է, որ Հայաստանի զինված ուժերը պետք է իրենց սպառազինման որակով, ցուցանիշներով հավասարվեն ՌԴ-ին, դա կարելի է համարել չափազանց մեծ ձեռքբերում»:
Հարցին, թե որակի առումով մենք պետք է արևմտյան, թե՞ ռուսական սպառազինության վրա շեշտը դնենք, նա պատասխանեց. «Իրականում, մենք այսօր ինչ-ինչ քաղաքական հանգամանքներից ելնելով, իհարկե, նաև մեր փորձից ու բանակաշինության մոդելից ելնելով պետք է շեշտը դնենք ռուսականի վրա, բայց առանձին դեպքերում առանձին տեսակների մասով, իհարկե, կարելի է և պետք է գործել Արևմուտքի հետ: Ընդ որում, այդ առանձին ասածը նույնիկ ռուսաստանն ինքն է գնում Արևմուտքից»: