Հայաստանի արտաքին գործերի նախարար Արարատ Միրզոյանը նախօրեին լրագրողների հետ ճեպազրույցում ասել է, որ Ադրբեջանը դեռ չի հստակեցրել իր արձագանքը Երևանի առաջարկների կապակցությամբ, որոնք վերաբերում են սահմանազատման և սահմանագծման գործընթացի աշխատանքի համար հանձնաժողով ստեղծելու հարցին: Ավելի վաղ, Հայաստանի վարչապետ Նիկոլ Փաշինյանը հայտարարել էր, որ Երևանը առաջարկ է ձևակերպել և ներկայացրել այն թե Բաքվին, թե նաև ռուսաստանցի ու եվրոպացի գործընկերներին:
Ըստ Փաշինյանի, այդ առաջարկները ներառում են տևական քննարկումների գործընթացում շոշափված հարցեր ու հանգամանքներ, որոնք Երևանը փորձել է ի մի բերել, հաշվի առնելով նաև Ադրբեջանի համար հնարավոր հետաքրքրություններ, որպեսզի ձևակերպվի փոխադարձ ընդունելի մոտեցում և հնարավոր լինի շարժվել առաջ: Թեև Ադրբեջանը ևս արտահայտվում է սահմանազատման և սահմանագծման աշխատանքային խումբը ձևավորելու և առանց նախապայմանի գործընթացը սկսելու մասին, սակայն բավականին նկատելի է, որ Բաքուն բոլորովին չի շտապում այդ հարցում: Այստեղ կա առնվազն երկու էական պատճառ: Եթե ձևավորվի երկկողմ աշխատանքային խումբ և սկսվի գործընթացը, ապա Ադրբեջանի համար բավականին բարդ կլինի գնալ սահմանային հրադադրի խախտումների, քանի որ սահմանազատման և սահմանագծման գործընթացի մեկնարկին մեծ հավանականությամբ կմշակվեն նաև այդ գործընթացը, այդ աշխատանքը զինված սադրանքներից զերծ պահելու մեխանիզմներ: Իսկ Ադրբեջանի համար այդ սադրանքի հնարավորությունը քաղաքական գործիքակազմի հիմնական մասնիկներից է, որից Բաքուն կհրաժարվի շատ դժվար: Կա նաև Թուրքիայի հանգամանքը, որը ևս կփորձի Բաքվին հնարավորինս հետ պահել Ռուսաստանի մասնակցությամբ այդ գործընթացից, եթե հաշվի առնենք, որ Անկարան այդ հարցում փաստորեն լինելու է խաղից դուրս: Այն դեպքում, երբ Եվրամիությունն օրինակ կարող է մասնակցել խորհրդատվական աջակցությամբ:
Մյուս հանգամանքը, որի պատճառով Բաքուն կնախընտրի չշտապել, և նրան այդ հարցում թերևս կքաջալերի նաև Անկարան, ուկրաինական ճգնաժամն է և դրա շուրջ ռուս-ամերիկյան բանակցության ակնհայտորեն բարդ, տարողունակ, չափազանց սուր և բարձր խաղադրույքով գործընթացը, որտեղ անկասկած Ուկրաինայի ճակատագիր չէ միայն, որ որոշվում է: Ու քանի դեռ այդ խոշոր և բարձր խաղադրույքով բանակցությունը անորոշության փուլում է, Ադրբեջանն ու նրան շղթայած Թուրքիան չեն շտապի Կովկասում որևէ քայլի, որը կարող է ենթադրել որոշակի պարտավորություն, առավել ևս կառուցողականության պարտավորություն: Ըստ այդմ, Բաքուն կփորձի հնարավորինս ժամանակ ձգել, հասկանալու համար, թե Ռուսաստանն ինչպես է դոււրս գալու ուկրաինական թնջուկից և այդ ելքը ինչպես է արտահայտվելու նրա կովկասյան կարողությունների վրա:
Լուսանկարը՝ Armeniasputnik-ի