Արցախի Հանրապետության նախագահ Արայիկ Հարությունյանի մասնակցությամբ հունվարի 25-ին տեղի է ունեցել «Շուշիի տեխնոլոգիական համալսարան» հիմնադրամի հոգաբարձուների խորհրդի նիստը, որ ընթացքում փակ գաղտնի քվեարկությամբ հոգաբարձուների խորհրդի անդամները միաձայն Շուշիի տեխնոլոգիական համալսարանի ռեկտոր են ընտրել Նվեր Միքայելյանին:
«Շուշիի տեխնոլոգիական համալսարան» հիմնադրամի հոգաբարձուների խորհրդի անդամ, Արցախի նախագահ Արայիկ Հարությունյանը շեշտել է, որ որակյալ կրթություն ապահովելու նպատակով գործադրվելու են բոլոր ջանքերը բուհի գործունեության համար անհրաժեշտ պայմանները վերականգնելու նպատակով:
Այս առնչությամբ «Առաջին լրատվական»-ի հետ զրույցում Շուշիի տեխնոլոգիական համալսարանի հոգաբարձուների խորհրդի նախագահ Հովհաննես Թոքմաջյանը նշեց. «Այն ծրագիրը, որ մենք սկսել ենք, շարունակելու ենք Արցախում, տեխնոլոգիական կրթությունը պետք է զարգացում ապրի, որը նաև անմիջականորեն կապված է պաշտպանության խնդիրների հետ, որովհետև տեխնիկայի, տեխնոլոգիաների իմացությունը խիստ կարևոր է նաև պաշտպանության համար:
մենք այսօր երեք ուղղություններ ենք առաջ տանում. IT, գյուղատնտեսական տեխնոլոգիաների զարգացումը, քաղաքաշինության և ջրային համակարգերի զարգացումը: Ջրային աղբյուրների շատ մասն արդեն մնացել է հկառակորդի հսկողության տակ, և մենք պետք է այլ ռազմավարություն որդեգրենք, որ կարողանանք ավելի քիչ ռեսուրսներով կարողանանք ապահովել և խմելու, և ոռոգման ջրերի առկայությունը»,-ասաց նա:
Թոքմաջյանի խոսքով, համալսարանը հետպատերազմյան շրջանում հետազոտական ուղղությամբ ևս լուրջ առաջընթաց է ունեցել, շուրջ 20 միջազգային ամսագրերում հրապարակված աշխատանքներ ունեն. «Բացի դրանից 10 գյուտ ունենք Գագիկ Ներսիսյանի գլխավորությամբ: Ամեն ինչ կախված կլինի նրանից, թե մենք առաջիկայում ինչպես կկարողանանք իրականացնել գիտակրթական բարեփոխումները՝ ավելի մոտեցնելով միջազգային չափանիշներին: Մենք իրավունք չունենք կրթությունը պահել եղած սահմաններում: Բաց տարածաշրջան է, մեր կրթագիտական համակարգը պետք է զարգանա, պետք է իշխանությունների ուշադրությունը հրավիրվի սրա վրա, կարծում եմ՝ այդպես էլ կլինի»,-ընդգծեց նա:
Հարցին, թե այսօր քանի ուսանողը ունի համալսարանը, Հովհաննես թոքմաջյանը պատասխանեց. «Մենք ուսանողության ընդամենը 9 տոկոսի նվազում ունենք: Սա այն համալսարանն է, որ պատերազմից հետո կարողացավ պահել իր ռեսուրսները, չնայած մեծ թվով զոհեր ենք տվել: Շատ մարդիկ կորցրել են իրենց տները, բնակավայրերը, սակայն նկատելի նվազում չենք ունեցել: Կարծում եմ՝ առաջիկա տարում ամբողջությամբ կվերականգնենք բոլոր ցուցանիշները: Մեր ուսանողների թիվը մոտը 1400 է եղել, այս պահին ավելի քան 1200 սովորող ունենք»:
Հովհաննես Թոքմաջյանը տեղեկացրեց, որ հիմա Ստեփանակերտում համալսարանին 5 կորպուս են տվել. «Նախկինում դա եղել է ուսումնարանի շենք, հիմա մեր համալսարանն է տեղավորված: Արդեն վերականգնում ենք գրադարանը, վերականգնել ենք արդեն մի քանի լաբորատորիաներ:
Այս պահին եղած միջոցները բավարար են, որ առաջ շարժվենք, բայց հետագայում պետք է մտածենք այլ աղբյուրներ գտնելու մասին, նաև սեփական միջոցներով ծրագրեր իրականացնելու մասին: Մասնավորապես, այս տարի համալսարանն իր ուժերով իրականացրել է Բերդաշենի ջրամբարի նախագծման աշխատանքները: Այդպիսի աշխատանքներ ևս պետք է կարողանանք կատարել, որը խիստ անհրաժեշտ է տեխնոլոգիական բուհերի համար, որ պրակտիկան, գիտությունն ու ուսումը իրար հետ համադրելի լինի»: