Նախօրեին Հայաստանի գործող չեմպիոն Երևանի «Ալաշկերտը» հանդես եկավ հայտարարությամբ, տեղեկացնելով, որ ֆուտբոլային ակումբի գլխավոր հովանավոր է դարձել բուքմեյքերական շուկայում հայտնի Masbet ընկերությունը։ «Ուրախ ենք տեղեկացնել, որ «Ալաշկերտի» գլխավոր հովանավոր է դարձել Marsbet ընկերությունը: Հայտնի ընկերությունը հանդիսանում է ավստրիական «Աուստրիա», ուկրաինական,«Զարյա», շոտլանդական «Հիբերնիան», բրազիլական «Ժուվենտուդե» ակումբների գլխավոր հովանավորը: Marsbet-ը համագործակցում է իտալական թոփ-ակումբների՝ «Յուվենտուսի», «Միլանի» և «Ինտերի» հետ: Լիահույս ենք, որ նոր հովանավորի հետ «Ալաշկերտը» ևս մեկ քայլ առաջ կկատարի ու կշարունակի ուրախացնել հայ ֆուտբոլասերներին»,- նշված էր երևանյան ակումբի հայտարությունում։ Կարճ ժամանակ անց սոցիալական ցանցերում և լրատվամիջոցներում տեղեկույթյուն տարածվեց, որ նշված բուքմեյքերական ընկերությունը թուրքական է։ Բարձրացած աղմուկին ի պատասխան «Ալաշկերտի» մամուլի ծառայությունը football365.am-ին պարզաբանում էր ներկայացրել․ «Մեր նոր հովանավորը թուրքական չէ: Միջազգային հանրահայտ ընկերություն է, որը համագործակցում է համաշխարհային լավագույն ակումբների հետ: Եթե այդ ընկերությունը որևէ կապ ունենար Թուրքիայի կամ թուրքականի հետ, ապա մենք պայմանագիր չէինք ստորագրի: Մեր հովանավորի անվանումը կլինի ինչպես մեր մարզաշապիկների վրա, այնպես էլ մարզադաշտի գովազդային վահանակներին: Ավելի մանրամասն կներկայացնենք մեր առաջիկա հրապարակումներում»։ «Ալաշկերտի» մամուլի ծառայությունից դժվարացել էին նշել այն երկիրը, որն իրականում ներկայացնում է «Marsbet» ընկերությունը: «Առաջին լրատվական»-ը ուսումնասիրելով «Marsbet» ընկերություան գործունեությունը քաղել է ուշագրավ տեղեկություններ։ Եվ այսպես, https://turkishbetting.com/review/marsbet-bookmaker/ պարբերականի համաձայն «Marsbet»-ը, որը համագործակցում է նաև աշխարհում հայտնի այլ ակումբների հետ, թուրքական է, գործում է Թուրքիայում։
Marsbet բուքմեյքերական գրասենյակը Թուրքիայում հայտնի է որպես MarsBahis, որը նախատեսված է առցանց խաղադրույքների համար։ Կայքը գործում է 2013 թվականից և առաջարկում է խաղադրույքների ամբողջական փաթեթ՝ սպորտ, օնլայն կազինո, սլոթեր և այլն: Կայքը հասանելի է թուրքերեն լեզվով և թուրքական արժույթով։ «Matsbet»-ը դասվում է նաև թուրքական 10 լավագույն բուքմեյքերական ընկերությունների շարքում։ Մեզ հայտնի դարձավ նաև, որ Թուրքիայում գործող ընկերությունը գրանցված է Նիդերնալդների Կյուրասո քաղաքում։ Կարճ ասած «Marsbet»-ը թուրքական ընկերություն է, որը գործելով Թուրքիայում գրանցված է օֆշորային գոտում գտնվող Կյուրասաո քաղաքում։ Զարմանալի է թերևս, որ հերքելով նշված ընկերության թուրքական լինելու փաստը «Ալաշկերտի» մամուլի ծառայությունը դժվարացել է նշել թե որ երկիրն է ներկայացնում ակումբի գլխավոր հովանավորը։ Ստացվում է, որ «Ալաշկերտի» ղեկավարությունը պայմանագիր է կնքել մի ընկերության հետ տեղյակ չլինելով դրա ծագումից։ Մեկնաբանությունները կարծում ենք ավելորդ են։
