Հայաստանի արտաքին գործերի նախարար Արարատ Միրզոյանը, որն աշխատանքային այց է կատարել Լյուքսեմբուրգ, թվիթերյան գրառում է արել Հայաստան-ԵՄ բաց սահմանների կարևորության վերաբերյալ: Արարատ Միրզոյանն այցելել է Շենգենյան համաձայնագրին նվիրված հուշարձանն, այնտեղ կախելով իր անհատական խորհրդանշական կողպեքը, այդ առնչությամբ էլ անելով սոցցանցային գրառումը: «Համոզված եմ, որ Հայաստանի և Եվրոպական միության միջև բաց սահմաններն էլ ավելի կզարգացնեն մեր գործընկերությունը և կխթանեն մարդկանց միջև շփումները», գրառել է Հայաստանի ԱԳ ղեկավարը:
Արդյո՞ք Արարատ Միրզոյանի Լյուքսեմբուրգ կատարած այցի ընթացքում օրակարգային կարևոր հարցերից մեկը հենց բաց սահմանների, այլ կերպ ասած՝ Հայաստան-ԵՄ վիզային ռեժիմի չեղարկման հարցն է: Հայաստանն ու Եվրամիությունը դրա վերաբերյալ երկխոսությունը փորձեցին սկսել 2017 թվականին Հայաստան-ԵՄ համաձայնագրի ստորագրումից հետո: Սակայն, հարցը կարծես թե չկա Հայաստան-ԵՄ քննարկումների առաջնային շարքերում: Համենայնդեպս պարզ չէ, թե այդ կապակցությամբ ինչպիսին է իրավիճակը և երկխոսությունը Երևանի ու Բրյուսելի միջև: Գործընթացը իհարկե բավականին տարողունակ և բարդ է, պայմանավորված չափանիշային բավականին խիստ սանդղակով: Սակայն անկասկած է, որ Հայաստան-ԵՄ հարաբերության խորացման համար առանց վիզային ռեժիմը կարող է լինել առանցքային, հիմնարար գործոն: Միևնույն ժամանակ հարցն այն է սակայն, որ կա աշխարհաքաղաքական իրողությունների խնդիրը ու թեև առանց վիզային ռեժիմի գործընթացը ուղիղ իմաստով քաղաքականացված չէ, այդուհանդերձ դրա քաղաքական նշանակությունը գերագնահատելը դժվար է:
Ահա այդ առումով, այն, ինչ այսօր կատարվում է Եվրոպայի ու Ռուսաստանի սահմանին կամ սահմաններին, ցավոք սրտի չափազանց հոռետեսական տրամադրություն է ձևավորում Հայաստան-ԵՄ առանց վիզային ռեժիմի շուրջ քննարկումների հեռանկարի տեսանկյունից: Սրա առանցքային պատճառն անշուշտ այն է, որ Հայաստանը գտնվում է անվտանգային, ռազմա-քաղաքական ռուսական համակարգում, ինչը չեղարկելը ներկայումս օբյեկտիվորեն դիտվում է անհնարին: Համենայնդեպս, դրա փորձը Հայաստանի համար հղի է բազմապատիկ ավելի ռիսկով, քան որևէ արդյունավետ լուծման հեռանկարով:
Միևնույն ժամանակ սակայն, անկասկած է, որ Հայաստանը այս իրավիճակում առավել քան ունի չճամբարականացվելու, այդպիսին չընկալվելու անհրաժեշտություն և շփումները այդ թվում Եվրամիության հետ դառնում են շատ կարևոր: Հայաստան-ԵՄ առանց վիզային ռեժիմի հասկանալիորեն թե ընթացակարգային, թե իրավակիրառական, թե քաղաքական առումով բավականին տարողունակ թեման այդուհանդերձ կարող է լինել այդ ուղղությամբ կոնկրետ խոսակցության առարկա: Պատրա՞ստ են կողմերը սրան, և արդյո՞ք Հայաստանի արտգործնախարարի գրառումն այդ իմաստով ոչ միայն զուտ սիմվոլիկ է, այլ նաև առարկայական պատրաստակամության մասին ազդակ՝ Եվրոպայից պատասխանի ակնկալիքով: