«Ալյանս» կուսակցության ղեկավար, ԱԺ նախկին պատգամավոր Տիգրան ՈՒրիխանյանը հայտնել է, որ Սանկտ Պետերբուրգում ձեռք է բերել «СПБ – Капиталстройэкс» ընկերության բաժնեմասերի 50 տոկոսը:
« Շինարարությունը ամենակայուն և հեռանկարային բիզնես ոլորտներից մեկն է։ Վստահ եմ` բիզնես հաջողությունները երբևէ կնպաստեն հայաստանյան քաղաքական նախագծերի իրագործմանը»,-գրել է նա:
Այս առնչությամբ Տիգրան Ուրիխանյանը «Առաջին լրատվական»-ի հետ զրույցում նշեց, որ այո, բիզնես գործունեություն է ծավալում տարբեր երկրներում, այդ թվում Ռուսաստանի Սանկտ Պետերբուրգ քաղաքում, սակայն այնտեղ տեղափոխվելու որևէ մտադրություն չունի:
«Ընտրություններից հետո, ժողովրդի կամոք պետական պաշտոնից ազատվելուց հետո մի քանի երկրներում զբաղվում եմ նման գործունեությամբ: Ես սրանով պատասխանում եմ բազմաթիվ հարցերին, թե ինչու եմ պարբերաբար բացակայում Հայաստանից: Իսկ Հայաստանում զբաղվում եմ քաղաքական գործունեությամբ, ղեկավարում եմ «Ալյանս» կուսակցությունը, որը պատրաստվում է փետրվարին երկրորդ ընդլայնված ֆորումին: Կուսակցական գործունեությունս շարունակվում է, անդամներով ավելի ակտիվ, ճիշտ այնքան ժամանակ, որքան ժամանակ «Ալյանսը» կպայքարի ՀՀ-ում իշխանության փոփոխության համար»,-ասաց նա:
Հարցին, թե չի՞ պատրաստվում ներդրումներ անել նաև Հայաստանում, Ուրիխանյանը նախ նշեց, որ Հայաստանի Հանրապետությունում չի ունեցել և չունի նման առաջարկ, առաջարկը եղել է Սանկտ Պետերբուրգում, ապա հավելեց, որ Հայաստանում ևս զբաղվում է տարատեսակ, այդ թվում ձեռնարկատիրական գործունեությամբ:
Դիտարկմանը, որ որևէ ընկերության 50 տոկոսի բաժնետեր դառնալը մեծ նյութական ռեսուրսներ է ենթադրում, նախկին պատգամավորն արձագանքեց. «Նայած ինչ ծավալի գործունեությունը է իրականացնում և ինչ շրջանառություն ունի տվյալ ընկերությունը»:
Լուսանկարը՝ panorama.am-ի