Դատավոր Ալեքսանդր Ազարյանի «թեթև ձեռքով» ճակատագրեր են խեղվել

Օրերս Դատավորների ընդհանուր ժողովը Դատավորների միության նախագահ և տեղակալներ ընտրեց: 139-ի կողմ ձայներով Դատավորների միության նախագահ ընտրվեց Ալեքսանդր Ազարյանը:

Ինչպես ավելի վաղ անդրադարձել ենք, 2008-ի մարտի մեկից հետո նույն Ազարյանի արձակած դատական ակտերի պատճառով Հայաստանը քաղբանտարկյալներ է ունեցել: Դատավոր Ազարյանի «թեթև ձեռքով» նաև ոչ քաղաքական գործերով ճակատագրեր են խեղվել:

Անդրադառնանք այդ գործերից մի քանիսին. «Դատալեքս» տեղեկատվական համակարգից տեղեկանում ենք, որ 2016-ին քաղաքացի Վանիկ Սլավիկի Սարգսյանին մեղադրանք է առաջադրվել այն բանի համար, որ նա, գտնվելով ոչ սթափ վիճակում, քրոջ ամուսնու հետ ընթացել է դեպի Հրազդան քաղաքի Միկրոշրջան թաղամասի շուկայի խաչմերուկի ուղղությամբ, սակայն ճանապարհի խաչմերուկում դեպի ձախ շրջադարձի կատարումն իրականացրել է ավտոմեքենայի ընթացքի այնպիսի արագությամբ, որի պայմաններում չի կարողացել ապահովել ավտոմեքենայի կառավարումը, ավտոմեքենան դուրս է եկել ճանապարհի աջ մայթի վրա՝ վրաերթի ենթարկել մայթով քայլող անչափահաս 11.06.2009թ. ծնված Արմեն Գագիկի Խանփերյանին, հարվածել «ՎԵՎ» սուպերմարկետի աստիճանահարթակին, ապա՝ մսի վաճառքի շինությանը, ինքն իրեն զրկելով ճանապարհատրանսպորտային պատահարը կանխելու տեխնիկական հնարավորությունից, ինչի հետևանքով էլ Արմեն Խանփերյանը գլխուղեղի կենսական կարևոր ֆունկցիաների սուր խանգարմամբ պայմանավորված գանգուղեղային բաց, բութ վնասվածք ստանալով՝ տեղում մահացել է: Այս ողբերգական ավտովթարի տեսագրությունը օրեր շարունակ շրջում էր համացանցում:

Ոչ սթափ վիճակում մահացու ելքով վրաերթ կատարած վարորդին առաջին ատյանի դատարանը ինչպես և պետք էր, կալանավորել էր, սակայն Ալեքսանդր Ազարյանը գրավի կիրառմամբ նրան ազատ է արձակել, դրա հետևանքով մահացած երեխայի ծնողը դանակահարել է վարորդին՝ պատճառելով մարմնական վնասվածք:

Երեխայի հորը՝ Գագիկ Խանփերյանին մեղադրանք է առաջադրվել այն բանի համար, որ նա 2016 թվականին սեպտեմբերի 5-ին, ժամը 17:30-ի սահմաններում, Հրազդան քաղաքի Միկրոշրջան թաղամասի 121-րդ շենքի հարևանությամբ գտնվող էլեկտրոէներգիայի բախշիչ ենթակայանի մոտ հանդիպելով իր որդուն վրաերթի ենթարկելու հետևանքով անզգուշությամբ մահ պատճառած Վանիկ Սլավիկի Սարգսյանի հետ` վրեժխնդրության շարժառիթով իր մոտ պահվող դանակով դիտավորությամբ հարվածներ է հասցրել նրան` պատճառելով ձախ այտի և պարանոցի ձախ կեսի կտրած-ծակած երկու վերքեր, կրծքավանդակի աջ և ձախ կեսի կտրած-ծակած, թափանցող երկու վերքեր, որի հետևանքով Վանիկ Սարգսյանի առողջությանը պատճառել է ծանր վնաս:

Վանիկ Սլավիկի Սարգսյանին մեղադրանք է առաջադրվել այն բանի համար, որ նա 16-01-2017թ.-ին ՀՀ Կոտայքի մարզի ընդհանուր իրավասության 1-ին ատյանի դատարանի կողմից լինելով դատապարտված ՀՀ քրեական օրենսգրքի 242 -րդ հոդվածի 2 մասի հատկանիշներով արարք կատարելու համար, և որպես լրացուցիչ պատիժ ` 3 տարի ժամկետով զրկված լինելով տրանսպորտային միջոցներ վարելու իրավունքից 24-02-2019թ.-ին վարել է ավտոմեքենա և Հրազդան քաղաքի Զորավար Անդրանիկի պողոտայի վրա ՃՈ աշխատակիցների կողմից ենթարկվել վարչական պատասխանատվության` տրանսպորտային միջոցը առանց վարորդական իրավունքի վկայականի վարելու համար:

Շարունակելի