ԵԽԽՎ խորհրդարանական պատվիրակության նախկին անդամ, ԲՀԿ-ական նախկին պատգամավոր Նաիրա Զոհրաբյանը հայտարարել է, որ եվրոպացի իր գործընկերներից ստույգ տեղեկատվություն ունի, պատրաստ է, իր իսկ խոսքով, ցանկացածի հետ «գրազ» գալ, որ շուտով Մարալիկում Սողոմոն Թեհլերյանի արձանն ապամոնտաժվելու է։ Նախկին պատգամավորը նշում է, որ փորձել է իր մտահոգությունները ֆեյսբուք սոցիալական միջոցով բարձրաձայնել, սակայն կես ժամ հետո նախազգուշացում է ստացել և գրառումը փակվել է։
Անի խոշորացված համայնքի ավագանու այս տարվա անդրանիկ նիստը հունվարի 21-ին է, ավագանու անդամները դեռևս տեղյակ չեն նիստի օրակարգից։ Համայնքի ղեկավարը չի արձագանքում լրատվամիջոցներին, չի փորձում անգամ հերքել տեղեկատվությունը։ Համայնքում տոտալ դժգոհություն կա ՀՀԿ-ական համայնքի ղեկավարից, պահանջում են նրա հրաժարականը։
Ավագանու անդամ, անկուսակցական Կամսար Հովսեփյանը «Առաջին լրատվական»-ի հետ զրույցում նշեց, որ խնդրին մեզնից է տեղեկանում, բայց շեշտում է՝ եթե ավագանու նիստին այս հարցը դրվի քննարկման, իր դիրքորոշումը կասի նիստին։
«Դեմ եմ և դեմ եմ լինելու, ինչո՞ւ պետք է հանվի Սողոմոն Թեհլերյանի արձանը։ Նման քննարկումներ այս պահին ավագանիում չկան»,-ասաց նա՝ հավելելով, որ համայնքի ղեկավարը միանձնյա նման բան չի կարող որոշել, առանց ավագանու որոշման՝ չի կարող որևէ բան իրականություն դառնալ․«Չորս տարի է՝ աշխատում եմ, միանձնյա որոշում երբևէ չի կայացվել»,-ասաց նա։
Անի համայնքի ավագանու դաշնակցական անդամ Արմենակ Նաջարյանն էլ «Առաջին լրատվական»-ի հետ զրույցում զգուշացրեց՝ եթե արձանն այդտեղից ապամոնտաժվի, պատերազմ կլինի․ «Տեղում ով փորձեց հանել արձանը, հաստատ արյուն կթափվի»,-ասաց ավագանու դաշնակցական անդամը։ Նա նշեց, որ մինչև այս պահը որևէ քննարկում համայնքի ղեկավարի և ավագանու անդամների միջև չի եղել, սակայն համայնքում խոսում են այդ մասին․
«Վաղը չէ մյուս օրը այս հարցը հաստատ քննարկելու ենք նիստի ժամանակ, տեսնենք՝ ինչ լուծում կտանք, ոնց կարող ենք ազգի պատիվը գետին գցել։ Մեկ շաբաթ էր գյուղում չէի, եկա, ժողովրդից իմացա, և հիմա պետք է որոշենք՝ ինչպես ենք խնդրին լուծում տալիս, որ արձանը տեղից դուրս չգա»,-ասաց նա։
Հարցին՝ արդյոք կա՞ որոշում արձանը հանելու, նա նշեց, որ համաձայնություն ավագանու անդամները չեն կարող տալ, իսկ թե ով է նման նպատակ դրել արձանը հանելու և ինչն է արձանը հանելու պատճառը, կոնկրետ այս պահին չգիտի․ «Ժողովուրդն ըմբոստացել է, ակտիվ է, անընդհատ զանգեր ունենք, ասում են՝ հանկարծ որևէ քայլ ապամոնտաժման, էլ մեզ չասեք սպասեք, մի խառնվեք, մենք կանգնելու ենք, պահենք արձանը»։
Պատճառը, ըստ նրա, կապված է նրա հետ, որ Մոսկվայում Թուրքիայի և Հայաստանի բանագնացների հանդիպման ժամանակ Թուրքիան պահանջել է, որվրիժառուների արձանները ապամոնտաժեն․ «Համենայն դեպս, այս խոսակցությունները մի քանի օր է, որ տարածվել են»,-ասաց նա։
