Հայ-թուրքական կարգավորման ուղղությամբ ծավալվող քաղաքական գործընթացը Հայաստանի խորհրդարանում արտահայտվեց իհարկե տպավորիչ բովանդակային քննարկումով, որ կարողացավ «թելադրել» Հայաստանի ներքաղաքական կյանքը բովանդակազուրկ դարձնելու վրա իր խաղադրույքը կատարած խորհրդարանական ընդդիմությունը: Նրանք առաջ բերեցին Հայաստանի բանակցող ներկայացուցչի «թուրքական ազդեցության գործակալ» լինելու թեման, իսկ խորհրդարանական մեծամասնությունն էլ հաճույքով լծվեց այդ թեմայի շրջանակում պատասխանելու գործին, հասնելով մինչև Ռոբերտ Քոչարյանի և ՀՅԴ իշխանության շրջան, Էրդողանի հետ նամակագրություն, և մինչև անգամ ՀՅԴ-երիտթուրքերի կառավարություն գործակցության ժամանակաշրջան: Այդպիսով, արմատական ընդդիմությունն իհարկե ստացավ շառաչուն պատասխան՝ «գործակալը դուք եք», կամ «ով-ով, բայց դուք մեզ գործակալ ասելու իրավունք չունեք» տրամաբանությամբ:
Արմատական ընդդիմության հանդեպ կառավարող մեծամասնության հաղթանակը ակնհայտ է, ինչպես որ ակնհայտ է նաև Հայաստանի խորհրդարանի «հավաքական» հաղթանակը քաղաքականություն երևույթի նկատմամբ: Անգամ ֆուտբոլային դիվանագիտության շրջանում Հայաստանում ծավալվել էր որոշակի բովանդակային քաղաքական միջավայր և որքան էլ չհնչի տարօրինակ, դրա նախաձեռնողը հենց կառավարող մեծամասնությունն էր կամ ֆուտբոլային դիվանագիտություն նախաձեռնած Սերժ Սարգսյանը: Այսօր Հայաստանի քաղաքական մեծամասնությունը դրսևորում է հայ-թուրքական կարգավորման գործընթացի և ընդհանրապես թեմայի վերաբերյալ քաղաքական նախաձեռնողականության գրեթե զրոյական աստիճան: Իհարկե, ներքաղաքական հանգամանքները այդ մեծամասնության համար անհրաժեշտ են դարձնում արմատական ընդդիմության քարոզչական գրոհներին որոշակի պատասխանի անհրաժեշտությունը: Սակայն, սրանից վեր կա նաև քաղաքական աշխատանքի անհրաժեշտություն, որը բխում է այն կարգավիճակից, որ ունի խորհրդարանական մեծամասնությունը: Արմատական ընդդիմությանը, Հայաստան դաշինքին արժանիորեն իր տեղը ցույց տալուց բացի, կառավարող քաղաքական ուժը թերևս պետք է կարողանա նաև անել այն, ինչ բխում է իր զբաղեցրած տեղից՝ Հայաստանում նախաձեռնել կամ փորձել նախաձեռնել բովանդակային քաղաքականություն, քննարկումներ, առավել ևս այնպիսի կարևորագույն թեմայի ու հարցի վերաբերյալ, որպիսին հայ-թուրքական խնդիրն է:
Լուսանկարը՝ panorama.am-ի
