Արցախում զորակոչ լինելու է, ամբողջությամբ պայմանագրային զինծառայության անցնելու որոշում չկա։ Այս մասին հունվարի 18-ին հրավիրած ասուլիսում հայտարարել է Արցախի պետնախարար Արտակ Բեգլարյանը։ Հարցին, որ բանակը վերակազմավորվում է, և ամբողջությամբ պայմանագրային ծառայության են անցնելու, երբ է դա տեղի ունենալու, զորակոչ լինելու է, թե՞ ոչ, Արտակ Բեգլարյանը պատասխանել է․«Ամբողջությամբ պայմանագրային զինծառայության չենք անցնում, որևէ նման որոշում չկա։ Զորակոչ լինելու է, որևէ որոշում չկա հակառակի մասին վկայող։ Այսինքն՝ ինչպես նախկինում եղել է զորակոչ, այնպես էլ տեղի է ունենալու Արցախի Հանրապետությունում։ Երբ նման որոշում լինի, հայտարարվելու է, բայց նմանատիպ քննարկում էլ չկա, որ զորակոչ չլինի»։
Ինչ վերաբերում է ոստիկանության զորքերի վերաբերյալ բարեփոխումներին, Բեգլարյանն ասել է․ «Ոստիկանական զորքերը զբաղվելու են և ներքին անվտանգության պաշտպանության հարցերում, և նաև ըստ կարիքի՝ արտաքին անվտանգության հարցերում»։
Ռազմաքաղաքական հարցերով վերլուծաբան Մհեր Հակոբյանը ողջունում է Արցախում զորակոչ լինելու մասին հայտարարությունը։ «Առաջին լրատվական»-ի հետ զրույցում Հակոբյանը մասնավորապես նշեց․«Սա ցույց է տալիս, որ Ալիևի այն հոխորտանքները, թե Արցախի հարցը լուծված է՝ իրականությանը չեն համապատասխանում։ Այն փաստը, որ Պաշտպանական բանակը գոյություն ունի ու համալրվում է՝ ինքը շատ դրական է»։
Մեր զրուցակիցն ընդգծեց՝ բնական է, որ սա արվում է ռուսական կողմի իմացությամբ և մեր օգտին է այն առումով, որ դրական առումով ցուցադրում է ռուսական կողմի փոփոխվող վերաբերմունքը Հայաստանի նկատմամբ․«Ընդ որում նկատենք, որ սա արվում է Ալիևի՝ Կիևում Ուկրաինայի տարածքային ամբողջականության վերաբերյալ հայտարարությունների ֆոնին։ Ես հակված չեմ այս ամենը համարել պատահական՝ հաշվի առնելով պաշտոնական Մոսկվայի ձեռագիրը։ Իրենք սիրում են անուղղակի ակնարկային մակարդակում գործել»։
Մհեր Հակոբյանի խոսքերով՝ Պաշտպանական բանակը սրանից կուժեղանա, սակայն գուցեև չունենա այն տեսքը, որին մենք սովոր ենք եղել․«Կարևորը լինի էֆեկտիվ։ Այս տարի շատ հետաքրքիր տարի է։ Ուկրաինայի շուրջ զարգացող իրադարձությունները շատ բան կորոշեն նաև մեր տարածաշրջանում»։
Հարցին, չի՞ առաջանա արդյոք սպառազինության խնդիր, վերլուծաբանը պատասխանեց․«Ինձ թվում է ծանր տեխնիկայի հետ կապված կարող են առաջանալ խնդիրներ՝ տանկեր, թնդանոթներ։ Բայց հաշվի առնելով, որ այնտեղ կա ռուսական բանակ, կարող է ծանր տեխնիկա չլինել։ Սովորական տեխնիկան էլ հակատանկային միջոցներ, հակաօդային պաշտպանության միջոցներ․․․ կարող է այդ մակարդակի լինել։ Եթե հասնի իրավիճակը նրան, որ ծանր տեխնիկա անհրաժեշտ լինի, ապա Գորիս-Խնձորեսկ հատվածում կարելի է կուտակել։ Եթե կարիք լինի՝ այդքան էլ հեռու չի լինի։ Ծանր զրահապատ տեխնիկայի բացակայությունը ժամանակակից պատերազմի պայմաններում ես խնդիր չեմ համարում։ Եթե բանը հասավ դրան՝ ի՞նչ տարբերություն տանկային գունդը կամ գումարտակը կգործի Ստեփանակերտի՞ մոտից, թե՞ Գորիսի։ Մեծ առումով դա խնդիր չէ, դինամիզմի ու ճկունության հաշվին այդ բացը կլրացվի»։
Մհեր Հակոբյանի դիտարկմամբ՝ վերջնական կոնֆիգուրացիայի իմաստով պաշտոնական Մոսկվան էլ դեռ վերջնական պատկերացում չունի․«Համենայնդեպս բոլորն ուժեղացնում են իրենց դիրքերը՝ մինչև տեսնեն, թե վերջնական ինչ է լինելու։ Բայց եթե Ուկրաինայում մարտական գործողություններ սկսվեցին Ռուսաստանի մասնակցությամբ՝ բոլորովին այլ իրավիճակ կունենանք։ Այդ դեպքում շատ սցենարներ են հնարավոր։ Եթե Ռուսաստանը լրջորեն խառնվի այդ պրոցեսին, ապա հետևանքները մեզ համար, մեծ հաշվով, բացասական են լինելու, բայց կարող են նաև դրական նոտաներ ունենալ։ Տասից ավել սցենարներ կան։ Պետք է պարզապես մենք ուշադիր ձևով մեր շանսը որսանք, հիմա թե դա ինչքան կկարողանանք՝ այլ հարց է․․․ ներքին կառավարչական որակի, պետական գործիչների իմացության խնդիր է, որը ցավոք այս պայմաններում մեզ մի փոքր պակասում է»։