Երուսաղեմում տոնական օրերը նախորդ տարիների նման հարթ չեն անցնում։ Նախորդ տարվանից սկիզբ առած խնդիրները՝ կապված պատրիարքի կնքած պայմանագրի հետ, ըստ որի՝ հայտնի Կովերի պարտեզը 99 տարով վարձակալության են հանձնել հրեա գործարարին, շարունակվում են լարվածության մեջ պահել համայնքը։
Ամեն տարի հունվարի 18-19-ին սաղիմահայերը տոնում են Սուրբ Ծնունդը, որն առաջնորդում է պատրիարքը։ Այս անգամ, սակայն, արարողակարգին ներկա չէր Նուրհան պատրիարքը։ Նա այս տարի պաշտոնական մուտք չի գործել Բեթղեհեմ այն պատճառով, որ անհանգիստ է Կովերի պարտեզի շուրջ ստեղծված իրավիճակից։ «Առաջին լրատվական»-ի հետ զրույցում սաղիմահայերից մեկն նշեց, որ Նուրհան պատրիարքը հավանաբար բացակա է ոչ թե որովհետև անհանգիստ է, այլ ենթադրում են, որ չի ուզում ներկայանալ Պաղեստինի իշխանության ներկայացուցիչների առջև, ինչպես նաև իր համայնքի առջև այն պատճառով, որ Պաղեստինի իշխանությունները իրենց բողոքն են արտահայտել պատրիարքի ստորագրած պայմանագրի՝ Կովերի պարտեզի հողատարածքի հանձնումը 99 տարով։
Մինչդեռ ամեն տարի Նուրհան պատրիարքը Բեթղեհեմ է մուտք գործում ըստ արորողակարգի, որտեղ նրան դիմավորում են Պաղեստինի իշխանության ներկայացուցիչները։ Ավելին, այդ արարողություններին Պաղեստինի վարչապետը կամ նախագահն են մասնակցում։
Հիշեցնենք, որ մեկ ամիս առաջ Պաղեստինի իշխանությունները պատվիրակություն ուղարկեցին Հայաստան՝ քննարկելու և կասեցնելու այս խայտառակ պայմանագիրը։
Տոնական արարողությանը բացական է եղել նաև Հայր Պարետ Երեցյանը, որը նույնպես պայմանագիրը ստորագրողներից մեկն է. «Ենթադրում ենք, որ նա իր տան մեջ մնաց այս տոնական օրով, քանզի ինքը նույնպես մերժված է Պաղեստինի և համայնքի կողմից, դրա համար էլ չմասնակցեց Սուրբ ծննդյան արարողություններին»։
Հակառակ նրան, որ Պաղեստինի իշխանությունները իրենց մտահոգություններն են հայտնել Կովերի Պարտեզի պայմանագրի դեմ, բայցևայնպես նրանք հարգել են Երուսաղեմի Հայոց Պատրիարքարանը և հայ համայնքին՝ ներկայանալով մեծ թվով պաշտոնյաների հետ եկեղեցական արարողություններին։
Խնդրի հետ կապված պատրիարքության միաբանները բաժանվել են երկու մասի, մի մասն աջակցում է պատրիարքին, մյուս մասը՝ մերժում։ Նշվում է, որ եթե այսպես շարունակվի և պատրիարքն ընդառաջ չգնա հանրությանը, ապա կպահանջեն պատրիարքի հրաժարականը։
Պետք է նշել, որ 99 տարով տարածքը վարձակալությամբ տալու համաձայնագիրը անօրինական է հենց այն առումով, որ որևէ մեկն իրավունք չունի հայկական կալվածքներն 99 տարով վարձակալության տալ, պատրիարքության կանոնադրությամբ, առավելագույն ժամկետը 49 տարին է:
Տոներից հետո գործընթացը կշարունակվի, պետք է փորձել կասեցնել խայտառակ պայմանագիրը։