Նոյեմբերի 28-ին Մոլդովայում տեղի ունեցան խորհրդարանական արտահերթ ընտրություններ: Առավոտյան ժամը 09.00-ի դրությամբ՝ 60% քվեաթերթիկների հաշվարկից հետո առջևում են կոմունիստները, որոնք հավաքել են 40,7%: 101 պատգամավոր ունեցող խորհրդարանում կոմունիստները կունենան 43 տեղ, ինչը նշանակում է, որ կրկին լուրջ խնդիրներ են առաջանալու նախագահ ընտրելու հարցում: Հիշեցնենք, որ Մոլդովայի նախագահին ընտրում է երկրի խորհրդարանը` պատգամավորների 2/3 ձայներով: Այս պահին ո՛չ ազատական թևն ունի այդքան տեղ, ո՛չ էլ՝ կոմունիստները:
Կոմունիստներին հաջորդում են լիբերալ-դեմոկրատները` 28,4% ձայնով (32 տեղ), դեմոկրատական կուսակցությունը` 13,4% (15 տեղ), ազատական կուսակցությունը` 8,6% (11 տեղ): Մյուս կուսակցությունները չեն հաղթահարում 4 տոկոսանոց արգելքը: Այս պահին շատ կարևոր է, թե, արդյոք, դեմոկրատական ուժերը կունենա՞ն 61 ձայն նախագահ ընտրելու համար:
Նախորդ խորհրդարանում դեմոկրատներն ունեին 53 ձայն, կոմունիստները 43 ձայն, ևս 5 ձայն ունեին անկախ պատգամավորները, որոնք խորհրդարան էին մտել կոմունիստների ցուցակով, սակայն դուրս էին եկել խմբակցությունից, քանի որ կոմունիստները հրաժարվել էին մասնակցել նախագահի քվեարկությանը:
