Հայաստանի ԱԺ պատվիրակությունը այց է կատարում ԱՄՆ: Ըստ տարածված տեղեկության, Հայաստանի պատվիրակությունն այցի ընթացքում հանդիպելու է ԱՄՆ Կոնգրեսի հայկական հանձնախմբի անդամներին, նախատեսված է նաև հանդիպում Կոնգրեսի Ներկայացուցիչների պալատի խոսնակ, Դեմոկրատական կուսակցության ներկայացուցիչ Նենսի Փելոսիի հետ: Հայաստանի խորհրդարանի պատվիրակությունն ԱՄՆ-ում եղել է 2018 թվականին՝ թավշյա հեղափոխությունից հետո, երբ ԱԺ նախագահը Արարատ Միրզոյանն էր, ինչպես նաև 2017 թվականի խորհրդարանի ընտրությունից հետո, երբ դեռևս ՀՀԿ մեծամասնությունն էր:
Առանձին-առանձին այդ այցերի թե քաղաքական միջավայրը, թե քաղաքական տրամաբանությունը իհարկե բոլորովին տարբեր էր, սակայն թերևս դրանք ունեն «մեկ ընդհանրություն»՝ այդ այցերը որևէ կերպ չեն շոշափել հայ-ամերիկյան հարաբերության զարգացման առարկայականություն, թեկուզ որոշակի ընդհանուր սկզբունքներով կամ ուրվագծերով: Ինչ «կշոշափի» նոր այցը, կերևա շատ մոտ ապագայում: Պետք է հուսալ, որ ԱԺ նախագահի ամերիկյան այցը կտարբերվի Ֆրանսիա կատարած այցից և «աչքի չի ընկնի» որևէ թեմայի վերաբերյալ «անկեղծ զրույցի» տեսաձայնագրային որևէ աղմուկով: Սակայն, եթե նշաձող պետք է դառնա ընդամենն աղմուկի բացակայությունը, ապա դա մեղմ ասած անարդյունավետ պատկեր է, եթե չասենք ՝ քաղաքականապես դատարկ «պաստառ»: Հետևաբար, եթե ԱԺ մի քանի պատգամավոր և մի քանի աշխատակից «կտրում են օվկիանոսը» ԱՄՆ այց կատարելու համար, ապա այդ այցը պետք է պարունակի շոշափելի քաղաքական բովանդակություն: Քաղաքականը տվյալ պարագայում լոկ հայ-ամերիկյան հարաբերության կարևորության մասին ճառերը չեն, ժողովրդավարության հավատարմության մասին հավաստիացումները չեն, այլ երկկողմ հարաբերության խորացմանն ուղղված շատ, թե քիչ կոնկրետություն պարունակող գաղափարներ, որոնք կստեղծեն դրանց հետագա կապիտալիզացիայի ուղղությամբ աշխատանքային հեռանկարներ: Ընդ որում, այդ գաղափարները կարող են լինել անգամ հասարակական, անգամ մշակութային, գիտական տիրույթում՝ ամենևին ոչ միայն լոկ ռազմա-քաղաքական, բայց ունենան շոշափելիություն իրենց տրամաբանության և հեռանկարների իմաստով: Ունա՞կ է Հայաստանի կառավարող մեծամասնությունն այդպիսի աշխատանքի և բովանդակության, եթե ոչ, ապա ԱՄՆ այցը մեծ հաշվով քաղաքական ժամանակի ու տարածության մեջ հավասարվելու է լոկ «քաղաքական զբոսաշրջության»:
