Նոյեմբերյանում մի տղամարդ որսորդական հրացանով կրակել է իր առանձնատան պատշգամբ մտած երիտասարդի վրա։ Տեղեկությունը հայտնում է ՀՀ ոստիկանությունը։
Նշվում է, որ հունվարի 15-ին՝ ժամը 03:35-ին, ոստիկանության Նոյեմբերյանի բաժնում հաղորդում է ստացվել, որ Նոյեմբերյան բնակավայրի Տերյան փողոցի տներից մեկում գող կա:
Դեպքի վայր մեկնած ոստիկանները պարզել են, որ ժամը 03:10-ի սահմաններում 24-ամյա երիտասարդը ցանկապատի վրայով մտել է նշված առանձնատան պատշգամբ։
«Նրան նկատել է տանտիրոջ դուստրը և հայտնել հորը: Նա էլ հետապնդել է երիտասարդին, ապա իր անվամբ հաշվառված որսորդական ակոսափող հրազենից մեկ անգամ կրակելով՝ մարմնական վնասվածք պատճառել նրան»,- նշված է հաղորդագրության մեջ:
Տուժածը շտապօգնության մեքենայով տեղափոխվել է հիվանդանոց: 59-ամյա տղամարդը, հրազենով հանդերձ, բերման է ենթարկվել ոստիկանություն, ապա ներկայացվել տարածքային նախաքննական մարմնին և ձերբակալվել: Կատարվում է նախաքննություն:
Ավելի վաղ հայտնել էինք, որ երիտասարդը կոնքի հատվածում է հրազենային վնասվածք ստացել, երբ փորձել է դիմել փախուստի՝ ցատկելով պատշգամբից: