«Գազելի» վթարից ամիսներ անց՝ հունվարի 15-ին, Գյումրու «Պաթոլոգոանատոմիական լաբորատորիայից» հաղորդում է ստացվել, որ հունվարի 14-ին՝ ժամը 17:20-ին, «հետվնասվածքային էնցեֆալոպատիա» ախտորոշմամբ «Գյումրի» բժշկական կենտրոնում մահացել և ժամը 19.00-ին իրենց մոտ է տեղափոխվել 2003 թ. ծնված Գևորգ Անդրեասյանի դիակը:
Մեկնած օպերատիվ խմբին Գ. Անդրեասյանի հորեղբայրը հայտնել է, որ եղբոր որդին մարմնական վնասվածքներն ստացել էր 2021 թ. հոկտեմբերի 20-ին Երևան-Գյումրի ճանապարհի 51-րդ կմ-ին «Գազել» մակնիշի ավտոմեքենայի վթարի ենթարկվելու հետևանքով:
Կատարվում է քննություն:
Հիշեցնենք՝ Երևան-Գյումրի ավտոճանապարհին «Գազելի» կողաշրջվելու հետևանքով 5 մարդ էր մահացել, ևս 13-ը տարբեր աստիճանի վնասվածքներով հոսպիտալացվել էին: Դեպքը տեղի էր ունեցել Արագածոտնի մարզի Կաքավաձոր գյուղի խաչմերուկում՝ Երևան-Գյումրի ավտոճանապարհի 50-րդ կմ-ին:
