Արուսյակ Հայրապետյանը ֆեյսբուքյան իր էջում գրել է․
Որևէ արձան, ինչքան էլ այն հիասքանչ լինի, չի զարմացնելու «ամբողջ աշխարհին», հավատացեք, աշխարհը լի է հիասքանչ արձաններով և չկա և չի կարող լինել այնպիսի նախագիծ, որը կգերազանցի այն, ինչ աշխարհն արդեն վաղուց հետևում է թողել։
Քաղաքակթական այս տրանզիցիոն ժամանակաշրջանում մարտահրավերներն այլ են, քան կրոնական ինքնությունն ու հայ ժողովրդի հարատևելու բանալիները մտքի զարգացման մեջ են։
Եթե ուզում եք իսկապես արժեքավոր գործ անել Հայաստանի համար, արձաններ ֆինանսավորելու փոխարեն հիմնադրեք Ազատ Համալսարան, Աբովյան քաղաքում։
Այդ բաց, ազատ, բոլորի համար հասանելի Համալսարանում դասախոսելու համար հրավիրեք աշխարհի լավագույն գիտնականներին, փիլիսոփաներին, գրողներին ու արվեստագետներին, դասախոսությունները՝ հանրության համար անվճար, ու անպայման հետո նրանց դասախոսությունները հրապարակեք հայերեն բարձրորակ թարգմանությամբ, մեծ տպաքանակով, Հայաստանի ու Սփյուռքի համար։
Այնուհետև, այդ համալսարանի մասնաճյուղեր բացեք Հայաստանի բոլոր մարզերում՝ մեկական, Արցախը ներառյալ։
Զարկ տվեք գիտության պրակտիկ զարգացմանը Հայաստանում՝ իրական քայլերով։
Եթե այստեսակ նախագիծ հաջողեք, իսկապես հարգանքի կարժանանաք, նաև՝ միջազգային, ինչն այդքան տենչում եք։
Եթե խորհրդատվության կարիք ունեք այստեսակ նախագիծ իրականացնելու՝ դիմեք, սիրով կօգնենք ձեզ։
