Թուրքիայի նախագահ Ռեջեփ Թայիփ Էրդողանը հունվարի 13-ին հանդիպել է Անկարայում Եվրոպական Միության երկրների դեսպանների հետ:
Այս մասին, հայտնում է թուրքական «Անադոլու» լրատվական գործակալությունը:
Թուրքիայի նախագահը հանդիպման ժամանակ հայտարարել է, որ Թուրքիան, ինչպես նախկինում, այնպես էլ հիմա ԵՄ-ի լիիրավ անդամ դառնալու նպատակ ունի:
Էրդողանը ուշադրություն է հրավիրել կորոնավիրուսի համավարակի հետեւանքների վրա։
«Ցավոք, համավարակը չմոտեցրեց 8,5 միլիարդ մարդուն, այլ միայն խորացրեց պառակտումն ու անարդարությունն աշխարհում։ Բացասական միտումներն արագացել են նաև Եվրամիության երկրներում։ Այլատյացության և իսլամաֆոբիայի դեպքերն ավելի հաճախակի են դարձել»,- ասել է Էրդողանը։
Նախագահ Էրդողանը կոչ է արել կանխել առանձին երկրների փորձերը սաբոտաժի ենթարկել Անկարայի և ԵՄ-ի միջև երկխոսությունը՝ Եվրամիության ներսում «համերաշխություն» ապահովելու պատրվակով։
Էրդողանը խոսել է միգրացիոն ճգնաժամից և խնդիրների լուծման հարցում ընդգծել Թուրքիայի ներդրումը:
«Միգրացիոն ճգնաժամը չի կարող լուծվել առանց Թուրքիայի և ԵՄ-ի սահմաններում առաջացող խնդիրների լուծման։ Յուրաքանչյուր ոք, ով օբյեկտիվորեն վերլուծում է իրավիճակը եվրոպական մայրցամաքում, գիտակցում է, որ Թուրքիան է այն խնդիրների լուծման բանալին, որոնց այսօր բախվում են ԵՄ երկրները։ Թուրքիայի շնորհիվ նվազել են միգրացիոն ճգնաժամի մասշտաբները, ինչպես նաև ահաբեկչական սպառնալիքի և ապակայունացման մակարդակը»,- դեսպանների հետ հանդիպմանը հայտարարել է Թուրքիայի ղեկավարը։
Էրդողանը ուշադրություն է հրավիրել սիրիական ճգնաժամի կարգավորմանն ուղղված Անկարայի ջանքերի վրա։
«Եթե չլինեին Թուրքիայի ջանքերը, իրավիճակը Սիրիայում և եվրոպական երկրներում այլ կլիներ»,- ասել է նա։
Անդրադառնալով Կիպրոսի հարցին՝ նախագահ Էրդողանը ափսոսանք է հայտնել այն փաստի համար, որ ԵՄ-ն հետևում է հունական կողմին՝ անտեսելով կղզու բնակչության անբաժան մաս կազմող կիպրոսցի թուրքերի օրինական իրավունքները։
Անկարան հուսով է, որ 2022 թվականին ԵՄ-ն կհրաժարվի իր ռազմավարական կարճատեսությունից և ավելի վճռական քայլեր կձեռնարկի Թուրքիայի հետ հարաբերությունները զարգացնելու ուղղությամբ, ասել է նախագահը։
Էրդողանը հանդիպման ժամանակ հայտնել է նաև, որ Թուրքիան Հայաստանի հետ հարաբերությունները կարգավորելու գործընթաց է սկսել:
