Ադրբեջանը կկասեցնի Արցախի հարցով զբաղվելու ԵԱՀԿ Մինսկի խմբի համանախագահության փորձերը, նախօրեին հայտարարել է Բաքվի ղեկավար Ալիևը, որն ինչպես հայտնի է համարում է, որ «Ղարաբաղի հարց չկա»: Իհարկե ինքնին հասկանալի է, որ Ալիևի այդ հայտարարությունները առավելապես ուղղված են ներքին սպառման, սակայն կասկած չկա նաև, որ Ալիևը արտաքին միաջավայրի որևէ հնարավորություն օգտագործելու է Մինսկի խմբի համանախագահության շրջանակում արցախյան հարցի քաղաքական գործընթաց թույլ չտալու, դրան խանգարելու համար: Ամբողջ խնդիրն այստեղ այն է, թե արդյո՞ք նա կունենա այդ արտաքին միջավայրային հնարավորությունը: Եվ այստեղ հարցը տեղափոխվում է Մինսկի խմբի համանախագահների դաշտ: Եթե համանախագահ եռյակը զբաղվի արցախյան հարցով, ապա Ալիևը կամ կներգրավվի այդ զբաղմունքի մեջ, կամ համանախագահները կզբաղվեն Ալիևով: Բայց, այսօր համանախագահ երկրները զբաղված են միմյանցով, իսկ ավելի ստույգ՝ համաշխարհային անվտանգության համակարգի և ազդեցության կամ պատասխանատվության գոտիների, այլ կերպ ասած նոր աշխարհակարգի շուրջ բավականին սուր և առարկայական քննարկումներով: Այս օրերին դրանց հերթական շրջափուլն է Եվրոպայում, որտեղ հանդիպեցին ԱՄՆ ու ՌԴ պատվիրակությունները, հետո եղավ ՆԱՏՕ-ՌԴ Խորհրդի նիստ՝ ընդ որում 2019-ից հետո առաջին անգամ: Քննարկվում են անվտանգային սահմաններ, փոխադարձ երաշխիքներ, ու դատելով հրապարակային հայտարարություններից այդ քննարկումները առայժմ չունեն էական արդյունք և կողմերը մնում են իրենց դիրքերին՝ մերժելով միմյանց պատկերացումները:
Ահա այստեղ է, որ հարց է առաջանում, թե այդ իրողությունը որքանով է խանգարում Մինսկի խմբի համանախագահության աշխատանքի հեռանկարին, հետևաբար որքանով է Ալիևի համար ստեղծում այն միջավայրը, որ թույլ է տալիս նրան սեփական հանրությանը ներկայանալ իբրև համանախագահ եռյակին կասեցնել կարողացող «սուպերմեն»: Ընդ որում, այս համատեքստում հետաքրքիր է, թե արդյո՞ք հունվարի 11-ին սահմանային սրացումից հետո՝ դրա կապակցությամբ կլինի Մինսկի խմբի համանախագահների դատապարտող հայտարարություն, ու բացի այդ, կլինի՞ համանախագահների ռեգիոնալ այց, որի մասին խոսվում է սկսած դեռևս 2021 թվականի հոկտեմբերից, որի մասին խոսվեց 2021 թվականի դեկտեմբերյան հանդիպումների շրջանում, բայց որը չի առարկայանում առ այսօր:
