Հունվարի 11-ին տեղի է ունեցել Հայաստանի արտաքին գործերի նախարար Միրզոյանի և Միացյալ Նահանգների պետքարտուղարի տեղակալ Քերըն Դոնֆրիդի հեռախոսազրույցը: Քննարկվել են ամենատարբեր արդիական հարցեր, այդ թվում Ղազախստանում ստեղծված իրավիճակը: Ըստ հաղորդագրության, Արարատ Միրզոյանը ներկայացրել է հայկական կողմի դիրքորոշումը: Այս հանգամանքի կարևորության մասին խոսել եմ նախօրեին հրապարակված հոդվածում և ողջունելի է, որ տեղի է ունեցել հայ-ամերիկյան դիվանագիտական բարձր աստիճանի խոսակցություն և քննարկվել է նաև Ղազախստանի հարցն ու Հայաստանի քայլերը:
Երևանի համար հույժ կարևոր է այդ հարցում բացատրվածությունը ժողովրդավարության զարգացման հիմնական գործընկերների, առաջին հերթին բնականաբար Միացյալ Նահանգների հետ: Միևնույն ժամանակ ուշադրության է արժանի, որ քննարկման թեմաներից է եղել հայ-թուրքական կարգավորման գործընթացը: Սա ուշադրության է արժանի այն առումով, որ թեման նախօրեին քննարկել են ԱՄՆ նախագահի խորհրդական Սալիվանն ու Թուրքիայի նախագահ Էրդողանի խորհրդականը: Այս իրողությունը վկայում է, որ Միացյալ Նահանգները բավականին ուշադրությամբ է վերաբերում հունվարի 14-ին Մոսկվայում սպասվող Հայաստանի և Թուրքիայի հատուկ բանագնացների առաջին հանդիպմանը: Սրան զուգահեռ, այդ ուշադրության պատճառ կարող էր լինել նաև Ղազախստանը, որի շուրջ իրադրությունն ու ռուս-թուրքական շահերի որոշակի բախումը առաջացրել են հարցեր նաև հայ-թուրքական գործընթացի վրա ազդեցության իմաստով: ԱՄՆ-ը գուցե փորձում է կամ չեզոքացնել հնարավոր ազդեցությունը, կամ համոզվել, որ այդպիսին չկա:
Բոլոր դեպքերում այս զարգացումների ֆոնին ուշադրության է արժանի այն, որ Ադրբեջանն է վերջին երկու օրերին կարծես թե բավականին սիստեմավորված սրում իրավիճակը թե արցախյան, թե Հայաստանի սահմանների ուղղությամբ: Սա ակնհայտորեն Բաքվի դժգոհության դրսևորում է, հարց է, թե ինչից՝ Ղազախստանում «թյուրքական» ուշացումից և նազարբաևյան էպոխայի ավարտից, երբ կա վտանգ, որ էլ չեն լինի «ալիևյան նամակների ընթերցումներ», թե՞ լարվածության սրման փորձ հայ-թուրքական կարգավորման գործընթացում Մոսկվայում սպասվող առաջին հանդիպման կապակցությամբ, որ տեղի է ունենում ԱՄՆ նկատելի ուշադրության, ամերիկա-ռուսական բավականին աննախադեպ տարողունակ բանակցային փուլի և Ղազախստանում ռուսական «բլից-կրիգի» պայմաններում: