Ղազախստանի շուրջ ծավալվող զարգացումերի, և դրանցում Երևանի անկասկած ոչ ցանկալի, սակայն օբյեկտիվ իրողություններից բխող անհրաժեշտ և թերևս անխուսափելի ներգրավվածության պարագայում, հույժ կարևոր է դառնում զուգահեռ աշխատանքի հանգամանքը: Զուգահեռ աշխատանք քաղաքական այն կենտրոնների և դերակատարների հետ, որոնք ներգրավված չեն եվրասիա-թյուրքական օղակում ծավալվող հերթական բռնկմանն անմիջականորեն, միաժամանակ ներկայանում են իրավիճակի գնահատման հարցում նաև ժողովրդավարա-իրավական հարցադրումների գործիքակազմով: Խոսքը մասնավորապես եվրաատլանտյան թևում գտնվող խաղացողների, միջազգային կառույցների հետ աշխատանքի մասին է, որի միջոցով նախ պետք է բացատրել Հայաստանի անհրաժեշտությունները, իրողությունից բխող օբյեկտիվ բարդությունները, ինչպես նաև ցրել որևէ կասկած Հայաստանի ներքին ժողովրդավարականության և իրավականության հաստատակամության առնչությամբ: Այդ իմաստով թերևս բավականին աշխույժ աշխատանք է պահանջվում Միացյալ Նահանգների ուղղությամբ, Եվրամիության ուղղությամբ, այդ թվում մասնավորապես օգտվելով նաև հանգամանքից, որ Եվրամիությունում նախագահում է Հայաստանի հետ բարեկամական առանձնահատուկ հարաբերություն ունեցող Ֆրանսիան:
Միաժամանակ, կարևոր ուղղություն է նաև ԵԱՀԿ-ն, այդ առումով էլ հաշվի առնելով Լեհաստանի հանգամանքը, որը ոչ միայն Եվրամիության կյանքում նկատելի քաղաքական դերակատարում ունեցող երկիր է, այլ 2022 թվականից ստանձնել է նաև ԵԱՀԿ նախագահությունը, և բացի այդ էլ աչքի է ընկնում ինչպես Հայաստանի հետ պետական հարաբերությունների ջերմությամբ, այդպես էլ ընդհուպ ժողովրդական մակարդակում պատմա-մշակութային խորը կապերով ու ընդհանրությամբ: Միաժամանակ, աշխատանքային անհրաժեշտության համատեքստում թերևս ևս մեկ անգամ ուշադրության է արժանի հանգամանքը, որ հունվարի 7-ին տեղի էր ունեցել հեռախոսազրույց Հայաստանի և Վրաստանի վարչապետերի միջև: Խոշոր հաշվով, հարկ է թերևս արձանագրել՝ իրական քաղաքականության ռեժիմով գնահատելով խնդրի առարկան և իրադրությունը, որ Հայաստանի վարքագիծը խոշոր հաշվով ունի նաև կանխարգելիչ նկատառում՝ Հայաստանի ներքին կյանքում ժողովրդավարական և իրավական հեռանկարների հանդեպ արտաքին ագրեսիայի ավելորդ առիթներ ու «հիմքեր» չստեղծելը, հատկապես աշխարհաքաղաքական բազմավեկտոր դիմակայության չափազանց սուր այս փուլում: