«Առաջին լրատվական»-ի զրուցակիցն է ՀԺԿ քարտուղար, ԱԺ նախկին պատգամավոր մեղրեցի Գրիգոր Հարությունյանը
–Օրերս քննարկում էր եղել, որտեղ երգիչ, երգահան Եղիշե Պետրոսյանը նշել էր, որ մեղրեցիներն ասում են, եթե այսպես շարունակվի, պատրաստ են դիմել Իրանին՝ նրանց կազմում ընդգրկվելու համար: Նման դժգոհություններ կա՞ն Մեղրիում:
-Իհարկե ոչ, խելագարություն է այդպես մտածելը: Մեղրիում մարդիկ հանգիստ իրենց համար աշխատում են, ապրում են, ոչ մի խնդիր չկա, ոչ մի սահմանային միջադեպ չկա: Եղիշե Պետրոսյանին ասեք, թող ինչ-որ ձևով ճշտի, թե ով է այդպես ասել և ինչու:
–Իսկ Սյունիքում ստեղծված իրավիճակը, Կապան-Գորիս ճանապարհին մաքսակետի տեղադրումը որքանո՞վ է անհանգստացնում տեղի բնակչությանը:
-Ընդհանրապես որ չափով հայ ժողովրդին անհանգստացնում է այդ իրավիճակը, նույն չափով էլ Սյունիքի բնակչությանն է անհանգստացնում: Եթե պատերազմը չի ավարտվել, եթե ընդամենը հրադադար է, բնականաբար, մարդկանց մեջ նաև անհանգստություն պետք է լինի, բայց այնպես չէ, որ մարդիկ խուճապի մեջ են, մտածում են՝ վայ, կորած ենք, վաղը ինչ է լինելու: Նման տրամադրություններ չկան: Այդ բոլոր տրամադրությունները Երևանում են սարքում ու այստեղից գնում է Սյունիք: Առավոտից երեկո որոշ հեռուստատեսություններ, լրատվամիջոցներ դա են փորձում անել:
–Դուք ինչպե՞ս եք գնահատում Սյունիքով երկաթգծի հնարավոր բացումը, Ի՞նչ է դա տալու Սյունիքին:
-Եկեք Սյունիքի մարզը չանջատենք Հայաստանից, ես չեմ հասկանում, թե ինչու են անընդհատ փորձում անջատել: Եթե Հայաստանին օգուտ լինի, կարո՞ղ է մարզին օգուտ չլինի: Ես ուրիշ հարց տամ. Քաջարանի և Ագարակի կոմբինատների խտանյութը հազարավոր տոննաներ են, օրական 40-50 մեքենա տեղափոխում են Երևան, որտեղից էլ բարձում են: Ենթադրենք, այդ խտանյութը Մեղրիի հատվածում բարձեն, օգուտ կբերի՞, թե՞ չի բերի, ծախսերը կկրճատվե՞ն, թե՞ չեն կրճատվի: Վերջապես քանի տարի մենք բողոքում ենք, որ շրջափակման մեջ ենք, հիմա եթե հնարավորություն կա, որ վերականգնվեն ճանապարհները, դե՞մ պետք է լինենք: Լավ, ենթադրենք չեն բացում ճանապարհները, դրանով մեր երկիրն ուժեղանո՞ւմ է, թե՞ թուլանում է: Վերջապես երկաթուղին ինքը ռազմավարական ոլորտ է, և դրանով շահագրգռված են շատ երկրներ, այդ թվում Իրանը, Ռուսաստանը, ԵՄ-ն: Այսինքն՝ դա ևս ինչ-որ ձևով երաշխավորում է անվտանգությունը: Կամ Հյուսիս-Հարավ ճանապարհը եթե գործի, դա նշանակում է, այլևս ոչ մեկը ռիօսկ չի անի հարձակվել այդ ճանապարհի վրա, որովհետև այդ ճանապարհը կապվելու է և Իրանի, և Ռուսաստանի, և Հնդկաստանի հետ: Ճանապարհները շատ կարևոր են:
Պատերազմը ջարդեց մեր մեջքը, բայց մենք ոտքի կկանգնենք:
Կապանում Իրանի հյուպատոսություն բացելը շատերն անհրաժեշտություն են համարում: Ինչպե՞ս եք գնահատում:
-Իհարկե դա դրական է: Դրա մեջ ի՞նչ վնաս կարող է լինել: Ռազմաբազա չեն դնում, հյուպատոսություն են բացում: Դա նշանակում է, որ մեր բարեկամ Իրանը հետաքրքրված է դրանով: Իրանը նույնպես հայտարարում է, որ սահմանների փոփոխությունն անթույլատրելի է, իրենք դա չեն ընդունի, և եթե նման բարեկամ երկիրն ուզում է հյուպատոսություն բացել, ինչի՞ պետք է դեմ լինենք: Երևանում որ դեսպանություն են բացել, վա՞տ է: Հյուպատոսությունն էլ բացում են, որ մարդիկ, որոնք ուզում են մեկնել Իրան, չգան հասնեն Երևան: