ՀԱՊԿ-ի հավաքական խաղաղապահ ուժերի ստորաբաժանումները հինգշաբթի սկսել են առաջադրանքներ կատարել Ղազախստանի տարածքում: Այդ հանրապետության իշխանությունները, երկրում ստեղծված իրավիճակով պայմանավորված, կազմակերպությունից օգնություն էին խնդրել մեկ օր առաջ, հաղորդում է ТАСС-ը։
ՀԱՊԿ խաղաղապահների համար այս գործողությունը կազմակերպության պատմության մեջ առաջինն է, մինչ այդ նրանք միայն զորավարժությունների են մասնակցել:
Ղազախստանի նախագահ Կասիմ-Ժոմարտ Տոկաևը չորեքշաբթի երեկոյան հայտարարեց, որ դիմել է ՀԱՊԿ-ին օգնության խնդրանքով։ Մի քանի ժամ անց Հայաստանի վարչապետ Նիկոլ Փաշինյանը, որն այժմ նախագահում է Հավաքական անվտանգության խորհուրդը, հայտարարեց, որ խաղաղապահներ կուղարկվեն այդ հանրապետություն «սահմանափակ ժամկետով՝ իրավիճակը կայունացնելու և կարգավորելու համար»։
Առայժմ հայտնի չէ, թե ՀԱՊԿ-ը որքան զորք կուղարկի Ղազախստան: Ընդհանուր առմամբ, կազմակերպության խաղաղապահ զորախումբը կազմում է մոտ 3,6 հազար մարդ, սակայն Հավաքական խաղաղապահ ուժերի կազմը յուրաքանչյուր դեպքում որոշվում է՝ ելնելով կոնկրետ իրավիճակից:
Հայտնի է, որ ՌԴ օդադեսանտային ուժերի ստորաբաժանումներ են ուղարկվել Ղազախստան, որոնք արդեն սկսել են կատարել իրենց առաջադրանքները։ Հանրապետությանն օգնություն ցուցաբերելու մտադրության մասին են հայտարարել Բելառուսն ու Տաջիկստանը։
Ղրղզստանում հայտնել են, որ ղրղզ զինվորականները կմասնակցեն միայն ռազմավարական օբյեկտների պահպանությանը և «խռովությունների մասնակիցների դեմ որևէ գործողություն չեն իրականացնի»։ Նրանց թիվը կորոշվի ուրբաթ, քանի որ հինգշաբթի համապատասխան որոշումներ կայացնելու իրավասություն ունեցող երկրի խորհրդարանը չկարողացավ քվորում ապահովել։
