Անվտանգային հարցերով փորձագետ Սոսի Թաթիկյանը ֆեյսբուքյան իր էջում գրել է. Պարոն Փաշինյան, վերջին թախանձագին խնդրանքը ձեզ՝ գոնե ոստիկաններ ուղարկեք, ոչ թե զինվորականներ։
Զինծառայողները չպետք է օգտագործվեն ներքին անվտանգային ու քաղաքական նպատակներով, հատկապես ցույցեր ճնշելու համար։ Բանակի ու ոստիկանության գործառույթների միջև պետք է լինի հստակ տարանջատում։
Եթե դուք զինծառայողներ ուղարկեք Ղազախստան, դուք, ի լրումն ամենի, նաև կլեգիտիմացնեք 2008 թ։ մարտին բանակի կիրառումը ցույցեր ճնշելու համար, իմ բան, որի դեմ պայքարել եք տարիներ շարունակ։
Սա ասում եմ որպես անվտանգության ուժերի կառավարման մասնագետ, ով 2008-2019 թ. ՄԱԿ-ում աշխատելիս պայքարել է ներքին քաղաքական ու անվտանգային նպատակներով բանակի օգտագործման դեմ ու կարողացել է դա ՄԱԿ-ում ու անգամ Աֆրիկյան Միությունում դարձնել նորմատիվ նորմ։
Միջազգային խաղաղապահ ուժերը բաղկացած են լինում ռազմական ու ոստիկանական ստորաբաժանումներից, գոնե զինվորականներ մի ուղարկեք, այլ ոստիկաններ։
Մի բան էլ ասեմ՝ չզարմանաք, եթե Ադրբեջանը առիթից օգտվելով Սյունիքում հերթական ռազմական սադրանքը նախաձեռնի։ Մեր զինվերականները զբաղված կլինեն Ղազախստանով, ՀԱՊԿ-ը մեզ իհարկե չի օգնի, Ադրբեջանը հիմա Առևմուտքի աչքում ոչ միայն ավելի հարուստ, այլև մեզնից ավելի ժողովրդավարական կերևա, իսկ Արևմուտքը այլևս երբեք, երբեք մեզ չի աջակցի։ Եվրամիության ֆինանսական օգնությունն էլ դժվար թե տեղ հասնի։
Հայաստանը կորցրեց իր արժանահավատության և հեղինակության վերջին մնացորդը։
