Հայաստանի վարչապետ Նիկոլ Փաշինյանը հայտարարել է, որ ՀԱՊԿ Խորհուրդը որոշում է կայացրել Ղազախստանում իրավիճակը կայունացնելու համար բավարարել այդ երկրի նախագահ Կասիմ-Ժոմաիտ Տոկաևի դիմումը և ՀԱՊԿ խաղաղապահ ուժեր ուղարկել Ղազախստան: Այդ մասին հայտարարում է Նիկոլ Փաշինյանը, որովհետև 2022 թվականի հունվարից Հայաստանը սկսել է նախագահել ՀԱՊԿ-ում և ընթացակարգային գործողությունները նախագահող երկրի պարտականությունն են: Այդ պատճառով նաև Ղազախստանի նախագահը հեռախոսազրույց էր ունեցել Փաշինյանի հետ, ինչից հետո Հայաստանի վարչապետը հայտարարեց ՀԱՊԿ մյուս երկրների նախագահների հետ խորհրդակցություն սկսելու մասին: Այդ տեղեկությունները վկայում են, որ ղազախական զարգացումները բավականին բարդ դրության առաջ են կանգնեցրել Հայաստանը: Կա մի քանի հանգամանք: Նախ, երբ Հայաստանն ինքն էր դիմում ՀԱՊԿ-ին՝ Հայաստանի սահմանի հանդեպ Ադրբեջանի ոտնձգության ժամանակ, ՀԱՊԿ-ը լռում էր և այժմ միանգամայն տրամաբանորեն առաջանում է պատասխան լռության անհրաժեշտություն:
Մյուս կողմից հասկանալի է, որ, եթե Երևանը ընթացք չտա Ղազախստանի դիմումին, ապա առաջին հերթին հակադրվելու է Ռուսաստանի հետ, հաշվի առնելով այն ոչ ֆորմալ, սակայն թերևս անկասկած իրողությունը, որ ՀԱՊԿ մեխանիզմը գործի է դրվում առաջին հերթին Ռուսաստանի քաղաքական ծրագրի համատեքստում: Երևանն այստեղ որպես նախագահող հայտնվում է այսպես ասած «միջնորդի» դերում: Դա ինքնին արդեն բավականին անցանկալի դեր է, եթե հաշվի առնենք այն, որ խոսքը ըստ էության ամբողջատիրական համակարգերի գերակայությամբ միջավայրի մասին է, որտեղ լուծվում են այդ համակարգերի պահպանման խնդիրներ, տվյալ դեպքում Ղազախստանում: Միևնույն ժամանակ նաև հասկանալի է, որ հատկապես իր ներկայիս դրության պարագայում Հայաստանի համար բացարձակապես նպատակահարմար չէ որևէ կերպ գնալ այդ համակարգերի հանդեպ հակադրության և այդպիսով «ավելորդ կրակ» վերցնել իր վրա:
Ըստ այդմ, Հայաստանը թերևս պետք է մնա նախագահողի պարտականությունից բխող «միջնորդ» դերում, այսինքն ձեռնպահ մնա արդեն ՀԱՊԿ խաղաղապահ օպերացիային զինվորական մասնակցությունից: Ըստ տեղեկությունների, ՀԱՊԿ խաղաղապահների անվան տակ Ղազախստան են մեկնելու ռուսական և բելառուսական ստորաբաժանումներ: ՀԱՊԿ խաղաղապահ զորակազմի և Ղազախստան մեկնելու, տեղակայվելու ժամանակացույցի մասին դեռևս չկա որևէ պաշտոնական հստակեցում: Միաժամանակ, ուշադրության է արժանի այն, որ սոցիալական բողոքի ցույցերի այսպես ասած քաղաքական տրանսֆորմացիան տեղի ունեցավ շատ արագ, ինչպես որ բավականին արագ եղավ Ղազախստանի իշխանության դիմումը ՀԱՊԿ-ին և ՀԱՊԿ մեխանիզմի գործարկումը: Սա անշուշտ ավելացնում է բազմաթիվ հարցեր Ղազախստանում տեղի ունեցողի կապակցությամբ:
