ՌԴ փոխարտգործնախարար Անդրեյ Ռուդենկոն հայտարարել է, որ Հարավային Կովկասում տնտեսական և տրանսպորտային բոլոր հաղորդակցությունների ապաշրջափակումը կարևոր է Երևանի և Բաքվի միջև հարաբերությունների կարգավորման համար. «Ըստ էության, խոսքը երկու երկրների համար խաղաղ գոյակցությունից գործնական կոնկրետ օգուտ քաղելու հնարավորության մասին է: Ռուսաստանն այդ գործընթացի անմիջական մասնակիցն է»,-շեշտել է նա:
Փոխնախարարը հիշեցրել է, որ 2021 թվականի հունվարի 11-ին Մոսկվայում կայացած գագաթաժողովում Ռուսաստանի, Ադրբեջանի և Հայաստանի ղեկավարները պայմանավորվել են եռակողմ աշխատանքային խումբ ստեղծել երեք երկրների փոխվարչապետերի համատեղ նախագահությամբ: Նրա խոսքով՝ այդ մեխանիզմի շրջանակում կարևոր նախապատրաստական աշխատանք է տարվել տարածաշրջանում ինչպես երկաթուղային, այնպես էլ ավտոմոբիլային հաղորդակցության վերականգնման համար. «Այժմ միասնական փաթեթը լրամշակվում է: Այդ մոտեցումը կապահովի ընդունված որոշումների կայունությունը»,-ընդգծել է նա:
Ռուդենկոն նաև հավելել է, որ համատեղ աշխատանքի համար անհրաժեշտ նախադրյալները դրվել են 2021 թվականի նոյեմբերի 26-ին Սոչիում Ռուսաստանի, Ադրբեջանի և Հայաստանի ղեկավարների համապատասխան պայմանավորվածություններով. «Մենք կենտրոնացել ենք համատեղ ենթակառուցվածքային նախաձեռնությունների պարամետրերի մշակման արագ ավարտի և կոնկրետ նախագծերի գործարկման վրա»,-ասել է ՌԴ փոխարտգործնախարարը:
Քաղաքագետ Անդրիաս Ղուկասյանի կարծիքով՝ Ռուսաստանի գործողություններւը չափազանց կարևոր են Ադրբեջանի և Թուրքիայի համար. «Որովհետև այդ ապաշրջափակման փաթեթն իրականում Ադրբեջանի և Նախիջևանի միջև բեռնափոխադրման կազմակերպման փաթեթ է: Ռուսաստանն այստեղ իր վրա վերցնում է անվտանգության ապահովումը»,-«Առաջին լրատվական»-ի հետ զրույցում ասաց նա:
Ղուկասյանը դժվարացավ նշել, թե դա ինչ հետևանքներ կունենա մեզ համար, սակայն ընդգծեց՝ այն որ սահամանափակվելու է մեր հետագա ազատությունը հայ-ադրբեջանական ու հայ-թուրքական հարաբերություններում՝ ակնհայտ է. «Այդպիսի բացասական գործոնը ինձ համար միանշանակ է»:
Մեր զրուցակիցը միևնույն ժամանակ ընդգծեց՝ ՀՀ իշխանությունները այդ վտանգները չեն գիտակցում:
Լուսանկարը՝ Armeniasputnik-ի