ՆԱՏՕ գլխավոր քարտուղար Յենս Ստոլտենբերգը հայտնել է, որ անվտանգային հարցերի քննարկման ՆԱՏՕ-Ռուսաստան Խորհրդի նիստը տեղի կունենա հունվարի 12-ին: Այդպիսով, հունվարի կեսին թերևս միանգամից երեք ձևաչափով տեղի կունենա ՌԴ-Արևմուտք քննարկում անվտանգային խնդիրների վերաբերյալ՝ ռուս-ամերիկյան պատվիրակությունների բանակցություն փոխարտգործնախարարների մակարդակով, ԵԱՀԿ հարթակ և ՆԱՏՕ-ՌԴ խորհրդի նիստ, ընդ որում բավականին մեծ դադարից և փոխադարձաբար ներկայացուցչությունների աշխատանքի դադարեցումից հետո: Այս ամենը ևս մեկ անգամ հուշում են, որ քննարկման սեղանին բավականին լուրջ հարցեր են, ընդ որում գուցե նաև վերջնագրային որոշակի տոնայնությամբ: Իհարկե այդ ամենին նախորդել է ՄԱԿ ԱԽ հինգ մշտական անդամ երկրների հայտարարությունը միջուկային պատերազմի անթույլատրելիության մասին, սակայն այս հանգամանքը որքան ուրախալի է, նույնքան կարող է առաջացնել հարցեր, կապված այլ բնույթի պատերազմների հետ:
Որովհետև, երբ արձանագրվում է միջուկային պատերազմ թույլ չտալու հանգամանքը, ապա հնարավոր է եզրակացնել, որ այլ բնույթի պատերազմները գոնե առժամանակ դիտարկվում են թույլատրելի: Իսկ այստեղ խոսքը անկասկած հիբրիդային պատերազմի մասին է, որը ներառում է թե կիբերհանցագործությունների, կիբերպատերազմների ոլորտը, թե ռեգիոնալ լոկալ արդեն տաք պատերազմների տարբերակը: Եվ այս իմաստով, ամերիկա-ռուսական, կամ Ռուսաստան-Արևմուտք բանակցությունների այդ խիտ շրջանում թերևս վճռվելու է հենց այդ հիբրիդային պատերազմների հեռանկարը, քարտեզը, ինտենսիվությունը և առնվազն միջնաժամկետ նպատակները:
