Պաշտպանության նախկին նախարար Դավիթ Տոնոյանը օրերս հարցազրույց է տվել և մի շարք ուշագրավ հայտարարություններ է արել: Մասնավորապես, նա նշել է, որ պատերազմի այլ արդյունքի պարագայում այսպիսի քրեական գործեր չէին հարուցվի. «Հակառակորդի գլխին թափվել է և նրան ոչնչացրել է շատ ավելի վաղ արտադրության զինամթերք… Գործ ունենք ինձ և պաշտպանական համակարգը վարկաբեկելու մոլեռանդ ցանկության հետ»,- նշել է նա:
Այս առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց. «Պաշտպանական համակարգը առանց այդ էլ վարկաբեկված է, էլ ո՞ւր վարկաբեկվի: Ասում են՝ քաղաքական հետապնդում է, ես այստեղ քաղաքական հետապնդում չեմ տեսնում: Ի՞նչ քաղաքական հետապնդում, վերջը, էդ հրթիռը հին էր, թե նոր: Բա ինչի՞ էր հին: Գնդացիրն ինչո՞ւ էր 1955 թվականի արտադրության, սալյարկայով աշխատող: Դու մեզ բացատրիր, մենք հասկանանք: Ասա՝ ես չեմ գնել, գնել է, ասենք, Սեյրան Օհանյանը, Մովսես Հակոբյանը: Պետք է մենք հասկանանք, թե այդ հին հրթիռը ոնց հայտնվեց մեր զինված ուժերում:
Ասում են՝ բան չի փոխվել, ո՞նց չի փոխվել: Եթե դու կարողանում ես խցում նստած հարցազրույց տալ և օգտվել քո խոսքի ազատության իրավունքից լիարժեք: Դե ասա, քաղաքական հետապնդում այստեղ ինչո՞ւմն է: Դավիթ Տոնոյանն օգտվում է խոսքի իրավունքից, օգտվում է պաշտպանվելու իր իրավունքից, թող պաշտպանվի»:
Ինչ վերաբերում է Դավիթ Տոնոյանի հայտարարությանը, թե «քավության նոխազ» գտնելու տեսանելի ցանկությունը սավառնում է քաղաքական դաշտում, բայց, այս առումով լինելու են անակնկալներ, Սիրունյանն ասաց. «Եթե բան է հասկացնում, թող նորմալ արտահայտվի: Այդ ո՞նց է լինում, որ Զինված ուժերի հրամանատարությունը ամբողջությամբ, ինքն էլ այդ թվում, ռազմական կրթություն չունի: Դեռ այն ժամանակ, երբ եղավ ԳՇ-ում «սուտի բունտը», ես մտա ՊՆ-ի կայքը և պարզեցի, որ այդ պահի դրությամբ ռազմական կրթություն ունեին Վաղարշակ Հարությունյանը, Արշակ Կարապետյանը, ԳՇ պետի տեղակալ Անդրանիկ Մակարյանը: Մնացածը մասնագիտական կրթություն չունեն: Եթե կտեսնես, որ ավարտել են ռազմական ուսումնարան, ապա ասեմ, որ ուսումնարանն արտադրում է լեյտենանտ, ընդհանուր ռազմական ակադեմիան արտադրում է մինչև գնդապետ, գեներալ դառնալու համար դու կամ պետք է Մոսկվայի ակադեմիան ավարտես, կամ համապատասխան ուսումնական հաստատությունները ԱՄՆ-ում ու Ֆրանսիայում: Ոչ մեկը դա չի ավարտել:
Հիմա ես Դավիթ Տոնոյանին հարց եմ տալիս, ասենք հասկացանք, որ հրթիռները հին էին, բա գեներալներն ինչի՞ էին հին: Ընդ որում, ինքն աշխատել է մի ժամանակաշրջանում, երբ, ըստ օդում կախված լուրերի, իրեն թույլատրված էր կայացնել ցանկացած որոշում»:
Դավիթ Տոնոյանը նաև հայտարարել է, որ առաջադրված մեղադրանքում տեղ գտած այնպիսի ձևակերպումներ, ինչպիսիք են «պաշտոնի բերումով տեղեկացված լինելով հրթիռների ժամկետներն անցած լինելու մասին», «նախնական համաձայնության գալով ՀՀ ԶՈՒ պաշտոնատար և այլ անձանց հետ», «շուկայականից էականորեն թանկ գնով», «շահադիտական դրդումներով», «հաշվի չառնելով ՊՆ-ում նույնատիպ հրթիռների ձեռք բերման իրական պահանջարկը» և այլն, քրեական գործով որևէ կերպ չեն հաստատվել: Ընդհակառակը, գործում առկա են դրանք հերքող բազմաթիվ ապացույցներ:
Փաստաբանն այս առնչությամբ նշեց. «Գործով նաև չի հաստատվել, բայց ինձ թվում է մի օր կհաստատվի, թե ոնց են զինվորի սնունդը գնում շուկայականից 40 տոկոս թանկ, ու ոնց է լինում, որ մատակարարներն իր մանկության ընկերներն են: Մեջները նույնիսկ մարդ կա, որը սննդի հետ բացարձակ կապ չունի, այդ բիզնեսի հետ կապ չունի: Եկեք խոսենք նրա մասին, թե այդ ոնց է լինում, որ ականազերծման կենտրոնի տնօրենը իր դվոյուրոդնի եղբայրն է: Ոնց է լինում, որ զինվորական քննչականնի պետը իր բաջանաղն է: Եկեք դրանց մասին խոսենք»:
