Բրազիլիայի նախագահ Ժաիր Բոլսոնարուն, ով աղիքային խնդիրների պատճառով հոսպիտալացվել էր, վիրահատության կարիք չունի: Այս մասին հայտնել է G1 լրատվական պորտալը:
«Նախագահի առողջական վիճակին հետևող բժիշկները բացառել են վիրահատության անհրաժեշտությունը»,- հայտնել է լրատվամիջոցը:
Նախագահի առողջական վիճակը բավարար է, նրան հատուկ դիետա են նշանակել:
2021 թվականի հունիսին Բոլսոնարուն արդեն մեկ անգամ հոսպիտալացվել էր աղիքային անանցանելիության պատճառով:
Առողջական խնդիրները Ժաիր Բոլսոնարուի մոտ սկսվել էին 2018 թվականին նրա դեմ իրականացված մահափորձից հետո, երբ նա դանակահարվել էր նախընտրական միտինգի ժամանակ: Այդ միջադեպից հետո Բրազիլիայի նախագահը մի քանի վիրահատության է ենթարկվել:
