Վարդենիսի համայնքապետի ՔՊ-ական թեկնածու Արամ Մելքոնյանն ընդդիմությանն առաջարկում է վայր դնել մանդատները և նոր ընտրություններ անցկացնել: Մելքոնյանը Facebook–ի իր էջում ուղիղ եթերով ներկայացրել էր համայնքապետարանում իր համակիրների հետ հանդիպումը։
2021թ–ի Դեկտեմբերի 5-ին կայացած ՏԻՄ ընտրություններում «Քաղաքացիական պայմանագիրը» ստացել է 13 մանդատ, «Ահարոն Խաչատրյան» կուսակցությունների դաշինքը` 10, իսկ «Միասնական Վարդենիս» կուսակցությունների դաշինքը` 4 մանդատ։
«Ահարոն Խաչատրյան» և «Միասնական Վարդենիս» դաշինքները միավորվելու որոշում են կայացրել։ Սակայն դրանից հետո մեղադրանք առաջադրվեց «Միասնական Վարդենիսը» գլխավորող, Վարդենիսի նախկին ղեկավար Արամ Հարությունյանին, նա կալանավորվեց։ Դեկտեմբերի 30-ին Վարդենիս քաղաքի ավագանու ընդդիմադիր ներկայացուցիչները նիստ գումարեցին և 14 կողմ ձայնով քաղաքապետ ընտրեցին «Ահարոն Խաչատրյան» դաշինքի առաջնորդ Ահարոն Խաչատրյանին:
«Եթե պատիվ ունեք, բերեք բոլորս բացեիբաց մեր մադատները վայր դնենք ու նոր ընտրության գնանք։ Ով կընտրվի, ես էլ հրապարակային ձևով կշնորհավորեմ։ Ձեզ ասեմ, որ վախենում են գնալ նոր ընտրությունների. այլևս չի լինելու այն մթնոլորտը, որ ընտրողներին խաբելով ձայներ հավաքեն»,–ասաց Մելքոնյանը։
Նրա խոսքով` Ահարոն Խաչատրյանի ընտրվելն իրավական տեսանկյունից առ ոչինչ է: Մելքոնյանը հավելեց, որ իրեն ընտրողների ձայները կորած չեն, քանի որ պայքարում են հետագա անելիքների ուղղությամբ։
