«Առաջին լրատվական»-ի հարցերին պատասխանել է Արցախի խորհրդարանի նախկին պատգամավոր Վահրամ Աթանեսյանը
Պարոն Աթանեսյան, մամուլը գրում է, որ Արցախում պետական հեղաշրջում անելու ծրագիրը ձախողված է, որ «Միասնական հայրենիքն» է այդպիսի փորձեր արել: Ընդդիմադիրները, բացի Բաբայանի խմբակցությունից, կարծես թե կողմ են քվեարկում բյուջերին, որևէ ինտրիգ այլևս չկա՞: Առհասարակ, ի՞նչ է կատարվում այս առումով Արցախում:
«Միասնական հայրենիքը» խորհրդարանում ունի ինը մանդատ, նախագահին անվստահություն կարելի է հայտնել նվազագույնը տասնյոթ քվեով: Եթե այդ կուսակցությունը պետական հեղաշրջման նպատակ ունեցել է, ապա պետք է քննարկումներ ունենար մյուս ոչ իշխանական խմբակցությունների հետ: Եղե՞լ են նման հանդիպումներ, բանակցություններ: Նման տեղեկատվություն, կարծես, չկա: Մեկ տարի նախագահի հրաժարական են պահանջել այն ուժերը, որ այսօր հանդես են գալիս որպես Արցախի սուբյեկտության պահապաններ: Իսկ բյուջեին կողմ են քվեարկել, որովհետև իրենց աշխատավարձն էլ քսան տոկոսով բարձրանում է: Տխուր պատկեր է առհասարակ: Չէի ցանկանա մանրամասնությունների մեջ մտնել: Այսօր Արցախում բոլորը ձգտում են բյուջեին մոտ լինել: Բիզնես է:
Տարեվերջին ականատես եղանք խորհրդարանի միասնական հայտարարությանը, որը ուղղված էր Հայաստանի վարչապետի դեմ: Արդյոք այս ամենը փաստում է, որ Արայիկ Հարությունյանն ընդդիմադիրների հետ էլ չունի կոնֆլիկտ:
Պետք է հետևել այդ Հայտարարությունից հետո հնչած տեսկետներին, դրանք հետքայլ են արձանագրում: Գոնե ես այդպես եմ հասկանում: Իսկ նախագահի սկզբունքային արձագանքից հետո ԱԺ-ն պետք է լռեր: Մանավանդ որ տեքստն էլ, մեղմ ասած, չի փայլում: Արցախում նախագահի հրաժարականը նաև խորհրդարանի լուծարում է ենթադրում, Ստեփանակերտում քաղաքական քաջություն չկա, որպեսզի խորհդարանականները գնան «ինքնասպանության»: Ժամանակ առ ժամանակ նրանք կքրթմնջան, որպեսզի «խոհանոցին ավելի մոտիկ լինեն» և՝ վերջ:
Հայաստանում սահմանադրական փոփոխությունների գործընթաց է մեկնարկել, որքանո՞վ է հնարավոր Արցախում նմանատիպ փոփոխություններ: Կա՞ դրա անհրաժեշտությունը, թե ոչ:
Արցախում վաղուց պիտի գնային սահմանադրական փոփոխությունների, բայց չեն անի: Առկա ստատուս-քվոն հիմնական դերակատարներին բավարարում է:
Կառավարման ինչպիսի համակարգ պիտի լինի Արցախում:
Հիմա պետք է Արցախը պահել: Ի՞նչ կառավարման համակարգի մասին է խոսքը: Ժամանակին պիտի փոխեին սահմանադրությունը, վերադառնային կիսանախագահական կառավարման: Հիմա դրա ժամանակը չէ:
