Դատախազությունը տեսանյութ է հրապարակել Գլխավոր դատախազ Արթուր Դավթյանի` միջազգային գործընկերների հետ 2021 թվականի հանդիպումների վերաբերյալ: ՌԴ գլխավոր դատախազի նախաձեռնությամբ հունվարի 12-ին Մոսկվայում տեղի էր ունեցել եռակողմ հանդիպում ՀՀ գլխավոր դատախազ Արթուր Դավթյանի, Ադրբեջանի Հանրապետության գլխավոր դատախազ Քյամրան Ալիևի, ինչպես նաև ՌԴ գլխավոր դատախազ Իգոր Կրասնովի մասնակցությամբ, որի նպատակն էր միջազգային իրավական ոլորտում հետագա շփումների ձևավորման, դրա համար անհրաժեշտ պայմանների, ինչպես նաև արդիական մի քանի հարցերի շուրջ քննարկման ծավալումը: Արթուր Դավթյանը բարձրացրել է հրադադարի մասին 2020թ. նոյեմբերի 9-ին ստորագրված եռակողմ հայտարարության 8-րդ կետի հնարավորինս արագ կատարման անհրաժեշտությունը, Ադրբեջանում գտնվող հայ ռազմագերիների և պահվող այլ անձանց սեղմ ժամկետներում Հայաստան վերադարձնելու, իսկ մինչ այդ նրանց կյանքի և առողջության երաշխավորման, նրանց այլ իրավունքների ապահովման հարցը:
Ապրիլի 8-ին Արթուր Դավթյանի հրավերով առաջին անգամ Հայաստան էր ժամանել ՌԴ գլխավոր դատախազ Իգոր Կրասնովը: Հանդիպման արդյունքներով Արթուր Դավթյանը և Իգոր Կրասնովը ստորագրել են համատեղ հայտարարություն՝ ՀՀ և ՌԴ գլխավոր դատախազությունների միջև համագործակցության զարգացման մտադրությունների վերաբերյալ, որն ուղղված է դատախազների որակավորման բարձրացմանը և բազմաթիվ ուղղություններով գործընկերության ամրապնդմանը:
Հունիսի 6-ին Սանկտ Պետերբուրգում կայացել էր Արթուր Դավթյանի և Իգոր Կրասնովի ևս մեկ հանդիպումը: Հանդիպման արդյունքում Արթուր Դավթյանը և Իգոր Կրասնովը ստորագրել են ՀՀ և ՌԴ գլխավոր դատախազությունների 2021-2025 թթ. համագործակցության առաջնահերթ ուղղությունների վերաբերյալ հուշագիր:
Սեպտեմբերի 9-ին Վլադիվոստոկում Արթուր Դավթյանն արդեն երրորդ անգամ է հանդիպում Իգոր Կրասնովի հետ: Հանդիպման օրակարգային հարցերից էր եղել 2020թ․-ի Արցախյան պատերազմից հետո տարածաշրջանում խաղաղության, կայունության և անվտանգության ապահովման հիմնախնդիրը, այդ համատեքստում բոլոր կողմերի ստանձնած պարտավորությունների կատարման վիճակը:
Սեպտեմբերի 23-ին Նուր-Սուլթանում ընթացող ԱՊՀ անդամ-պետությունների գլխավոր դատախազների համակարգող խորհրդի նիստի շրջանակներում Արթուր Դավթյանը հանդիպել էր Ադրբեջանի գլխավոր դատախազ Քյամրան Ալիևի հետ` ՌԴ գլխավոր դատախազ Իգոր Կրասնովի մասնակցությամբ: Կողմերն ընդգծել էին եռակողմ հանդիպման ձևաչափի կարևորությունը հատկապես Արցախում և տարածաշրջանում կայունության և օրինականության, Արցախի բնակչության բնականոն կենսագործունեության, անվտանգության հաստատմանն ուղղված ջանքերին նպաստելու առումով:
Գլխավոր դատախազի հրավերով հոկտեմբերի 12-ին եռօրյա աշխատանքային այցով Հայաստան էր ժամանել Իրանի Իսլամական Հանրապետության գլխավոր դատախազ Մոհամմադ Ջաֆար Մոնթազերին:
Հանդիպման ընթացքում քննարկվել են երկու երկրների դատախազությունների համագործակցության ծրագրերից բխող՝ հանձնման և քրեական գործերով իրավական օգնության բնագավառում համագործակցության, թմրամիջոցների մաքսանենգության և ապօրինի շրջանառության, ինչպես նաև ապօրինի սահմանահատումների և ապօրինի միգրացիայի դեմ համատեղ պայքարին, նման հանցավոր դեպքերով քննությունների, հանցավոր ծագման ակտիվների հայտնաբերման, առգրավման, բռնագրավման և արտերկրից վերադարձման ուղղությամբ փորձի փոխանակմանն ուղղված միջոցառումների շարունակման խնդիրները:
Դեկտեմբերի 13-ին ՀՀ գլխավոր դատախազ Արթուր Դավթյանի գլխավորած պատվիրակությունն աշխատանքային այցով մեկնել էր Եգիպտոսի Արաբական Հանրապետությունում՝ մասնակցելու Շարմ Էլ Շեյխում մեկնարկող Կոռուպցիայի դեմ պայքարի ՄԱԿ-ի կոնվենցիայի անդամ երկրների համաժողովի 9-րդ նստաշրջանի 5-օրյա աշխատանքներին: Արթուր Դավթյանը Շարմ Էլ Շեյխում հանդիպել է Եգիպտոսի գլխավոր դատախազի առաջին տեղակալի Մոհամմադ Խալաֆի և Լիտվայի Հանրապետության գլխավոր դատախազ Նիդա Գրունսկինեի հետ: