Բժիշկ-նյարդաբան, բժշկական գիտությունների դոկտոր Եվգենի Շիրոկովը պատմել է գլխացավի ոչ ակնհայտ պատճառների մասին:
Նրա խոսքով՝ գլխացավերը ոչ միշտ կարող են կապված լինել կոնկրետ հիվանդությունների հետ, դա կարող է լինել օրգանիզմի ռեակցիան արտաքին գործոններին: Օրինակ՝ գլուխը կարող է ցավել տոթ հաստատությունում, որտեղ քիչ է թթվածինը, առկա է ածխաթթու գազի ավելցուկ և բարձր ջերմաստիճան, ինչը ընդհանուր առմամբ հանգեցնում է անոթային սպազմների և ներգանգային ճնշման բարձրացման:
Գլխացավի այլ պատճառ կարող է լինել ջրազրկումն ու նստակյաց կենսակերպը:
«Կարող է առաջանալ նյարդային վերջավորությունների գրգռում, ինչը հանգեցնում է մկանների սպազմի, դա էլ իր հերթին հանգեցնում է երակային արտահոսքի խանգարման: Դա ստեղծում է գլխացավի առաջացման բոլոր պայմանները»,- բացատրել է մասնագետը «Ռոսիա 1» հեռուստաալիքի եթերում:
Բացի դրանից, Շիրոկովը խորհուրդ է տվել բաց չթողնել նախաճաշը, քանի որ դրա բացակայությունը կարող է գլխացավ առաջացնել:
Գլխացավը կանխելու միջոցների շարքում բժիշկն առանձնացրել է օրական առնվազն կես ժամ ամենօրյա զբոսանքները, տաք կամ սառը ցնցուղ ընդունելը, գլխի մերսումը, ինչպես նաև ամենօրյա ռեժիմի պահպանումը:
