Մենք շատ լավ հնարավորություն ունենք օգտվելու տարածաշրջանում ստեղծված նոր իրավիճակից: Պատճառը, որով այս մասին խոսում եմ Ադրբեջանի և Հայաստանի ղեկավարների դիրքորոշումն է. նրանք երկուսն էլ հանդես են գալիս հանուն խաղաղության տարածաշրջանում:Այս մասին «Իմեդի» հեռուստաալիքին տված հարցազրույցում ասել է Վրաստանի վարչապետ Իրակլի Ղարիբաշվիլին:
«Այս տարի Վրաստանը կարևոր նախադեպ է ստեղծել տարածաշրջանում, և ես շատ ուրախ եմ, որ դա տեղի է ունեցել իմ միջնորդությամբ: Մենք ստեղծել ենք առաջին նախադեպը մեզ համար բարեկամ և հարևան երկու երկրի միջև»,- Minval.az-ի փոխանցմամբ՝ ասել է Ղարիբաշվիլին:
Անդրադառնալով Թուրքիային՝ Ղարիբաշվիլին հայտարարել է հետևյալը. «Անկասկած, Թուրքիան շատ կարևոր խաղացող է տարածաշրջանում: Մենք բարեկամական և եղբայրական հարաբերություններ ունենք Թուրքիայի հետ»: Վրաստանի հարցերով փորձագետ Ջոնի Մելիքյանի խոսքերով՝ Վրաստանի վարչապետն ամփոփելով տարին հիշել է նաև հայ-ադրբեջանական հարաբերություններում իր ներդրումը․ «Հիմա իրավիճակը հետևյալն է․ դեռևս Վրաստանը 3+3-ի հետ կապված սկեպտիկ մոտեցում ունի, քանի որ ԱՄՆ-ի հետ հարցերը լուծված չեն։ Երբ ԱՄՆ-ի հետ գան մի կարծիքի, որ պետք է տարածաշրջանում դերակատարություն ունենալու համար Վրաստանի մասնակցությունը, այդ ժամանակ իրենք այդ մասնակցությունը կունենան։ Մինչ այս պահը Ադրբեջանի ու Հայաստանի հետ կփորձեն իրենց առաջ քաշած եռակողմ ֆորմատը առաջ քաշել՝ Վրաստանի նշած խաղաղ տարածաշրջանային համագործակցության շրջանակներում։ Գուցե հնարվորություն լինի անել ինչ-որ բաներ, ինչպես որ դա եղավ հունիսին, երբ 15 ռազմագերու հարց լուծվեց»,-«Առաջին լրատվական»-ի հետ զրույցում ասաց նա։
Մելիքյանի դիտարկմամբ՝ դրա զուգահեռ Վրաստանը կփորձի հետևել տարածաշրջանային զարգացումներին․«Շատ կարևոր կլինի Անկարայի նախաձեռնած 3+2 ձևաչափի ընթացքը։ Դրանից հետո գուցե Վրաստանի վարչապետն այցելի Անկարա՝ քննարկելու, թե տարածաշրջանում ինչ զարգացումներ են տեղի ունենում։ Ի վերջո Վրաստանն էլ տարածաշրջանի մի մասնիկն է, որտեղ խաչվում են ոչ միայն ճանապարհները, այլ կան բազմաթիվ այլ կարևոր հանգամանքներ ևս։ Դրա համար էլ Վրաստանի վարչապետն ասաց, որ շարունակելու ու ակտիվ օրակարգով են հանդես գալու տարածաշրջանային զարգացումների հետ կապված»։
Մեր զրուցակիցը նաև չի բացառում, որ Վրաստանում կարող է տեղի ունենալ արտգործնախարարի փոփոխություն․«Նոր նախարարի պարագայում սպասվում է, որ փորձ ունեցող ակտիվ գործիչ է լինելու, որն աշխատել է միջազգային տարբեր կառույցների հետ։ Այդ հնարավոր փոփոխությունը կարող է իրենց տարածաշրջանային քաղաքականությանը նոր իմպուլս տա։ Իրենք կշարունակեն եվրոինտեգրման ու ՆԱՏՕ-ի հետ համագործակցության շրջանակը, կփորձեն մինիմումի հասցնել նար ներքաղաքական զարգացումներից եկող վտանգները»։