Ֆրանսիայի Ծերակույտի գրասենյակը վավերացրել է Արցախի մասին միջազգային տեղեկատվության խումբ կազմելու առաջարկը: Այս նախաձեռնությունը լրացնում է 2020 թվականի նոյեմբերին՝ Արցախի Հանրապետությունը ճանաչելու անհրաժեշտության մասին Ծերակույտի ընդունած բանաձևը:
Ֆրանսիա-Արցախ բարեկամության շրջանակի նախագահ Ֆրանսուա Փիփոնը իր շնորհակալություն է հայտնել ընդունված որոշման համար և նշել, որ դա հերքում է բոլոր այն անձանց դիրքորոշումը, որոնք Ադրբեջանի կողմից արցախյան տարածքի զգալի մասի զավթումով համարում են, որ արցախյան հարցը լուծված է։
Ծերակույտի հրապարակած մամլո հաղորդագրության մեջ նաև նշվում է, որ միջազգային տեղեկատվության այս խումբը կազմվել է Ծերակույտի Ֆրանսիա-Հայաստան և Ֆրանսիա-Կովկաս բարեկամության խմբերի հետ համաձայնությամբ և այն նպաստում է հակամարտությանն արդար, խաղաղ և մնայուն կարգավորման որոնմանը։
Արցախի արտաքին գործերի նախարար Դավիթ Բաբայանն «Առաջին լրատվական»-ի հետ զրույցում ողջունելով Ֆրանսիայի Ծերակույտի որոշումը, նշեց․<<Ցանկացած որոշում, որն իր մեջ պարունակում է մարդու իրավունքների պաշտպանության հաղթանակ, մարդասիրության տարրեր, եմքն իհարկե բարձր ենք գնահատում ու շատ կարևորում ենք նման քայլը»։
Թե ինչ կտա գործնականում այդ որոշումը, Բաբայանը նշեց՝ այն նոր է ստեղծվել, ժամանակը ցույց կտա․ «Բայց կարծում ենք, որ կարող է դրական ազդեցություն ունենալ։ Կախված է նաև մեր աշխատանքից։ Ամեն դեպքում՝ ըստ իս, իր դրական ներգործությունը կունենա»։
Ինչ վերաբերում է իրավական հնարավոր հետևանքներին, մեր զրուցակիցն ասաց․ «Ցանկացած քայլ քաղաքական հետևանքներ է ունենալու։ Կարևորը իրավականը չէ, քաղաքականն է»:
Դավիթ Բաբայանը շեշտեց՝ Ֆրանսիան մի երկիր է, որտեղ կա մեծ հայկական համայնք, կարևորագույն սփյուռքի կենտրոններից է․ «Այդ երկիրը մենք համարում ենք բարեկամական։ Ֆրանսիան ԵԱՀԿ Մինսկի խմբի համանախագահող երկրներից մեկն է, նաև ՄԱԿ-ի Անվտանգության խորհրդի մշտական անդամներից մեկն է։ Այսինքն՝ երկիր է, որն ունի ազդեցություն, հետևաբար սա շատ կարևոր է։ Նման երկրների ցանկը պետք է ընդլայնվի»:
