«Առաջին լրատվական»-ի զրուցակիցն է ՄԱՀՀԻ ասոցացված փորձագետ, քաղաքագետ Դավիթ Ստեփանյանը:
-Պարոն Ստեփանյան, ի՞նչ դիտարկումներ ունեք վարչապետի՝ Վրաստան կատարած այցի վերաբերյալ: Ակնհայտ է, որ բացի տնտեսական հարցերի շուրջ պայմանավորվածություններից, այցն ուներ նաև քաղաքական բաղադրիչ, ինչն առավել ուշագրավ է Թբիլիսիի՝ «3+3» ձևաչափից հրաժարվելու ֆոնին: Որո՞նք են այցի հիմնական արձանագրումները:
-Վրաստանի հետ հարաբերությունները մեզ համար շատ կարևոր է, որովհետև այդ երկիրը մեր չորս հարևաններից ամենամոտն է մի շարք հանգամանքներից ելնելով: Դուք ճիշտ հիշատակեցիք 3+3-ը:Միանշանակ բանակցություններում այս հարցը քննարկվել է, թեպետ Թբիլիսին հայտարարել է, որ այդ ձևաչափին չի մասնակցելու, քանի որ դա չի բխում այդ երկրի շահերից: Մենք տեսնում ենք, որ Վրաստանի վրա կա ճնշում՝ առաջին հերթին Մոսկվայից, երկրորդ հերթին՝ Անկարայից,որպեսզի Վրաստանը միանա այդ ֆորմատին, որովհետև ֆորմատը չի կարող լիովին կայանալ առանց Վրաստանի: Ռեգիոնալ ապաշրջափակումն ավելի լայն կոնտեքստ ունի, միայն Վրաստանով ու Ադրբեջանով հարցը չի լուծվում: Այդ առումով կարծում եմ, քանի որ Հայաստանը մտել է այդ ֆորմատի մեջ, վարչապետը Վրաստանում փորձել է որոշակի բանակցություններ վարել ու ինչ-որ առաջարկներ է ներկայացնել, որպեսզի Վրաստանը հետ կանգնի իր դիրքորոշումից ու մասնակցություն ունենա այդ ձևաչափին:
-Իսկ հակառակն ավելի ձեռնտու չէ՞ր լինի Հայաստանին: Այսինքն՝ օգտագործելով Վրաստանի մերժումը, մենք ևս հրաժարվեինք 3+3-ից:
-Եթե Հայաստանում լիներ համապատասխան քաղաքական կամք, եթե մենք հասկանայինք,թ ե որոնք են մեր ռեալ շահերը՝ շատ հնարավոր է այդ տարբերակը լիներ: Ցավոք սրտի այսօր ես դա չեմ տեսնում, թեպետ ինձ էլ է թվում, որ շատ ավելի ճիշտ կլիներ, որ մենք Վրաստանի հետ լինեինք այդ հարցում ու ընդհանրապես քանդեինք այդ 3+3-ը: Բայց դա տեղի չի ունենում, քանի որ Ռուսաստանի ճնշման լծակները մեզ վրա ավելի մեծ են, քան օրինակ, Վրաստանի վրա:
-Կարծում եք՝ Վրաստանի մերժումը վերջնակա՞ն է, թե՞ ինչ-որ պահից Թբիլիսին էլ մասնակցություն կունենա այդ ֆորմատին:
-Ես չեմ բացառում Վրաստանի մասնակցությունը հետագայում: Որոշակի ինֆորմացիա կա այդ առումով և ճնշումը գնալով մեծանալու է: Եթե արևմուտքի կողմից համապատասխան վերաբերմունք չլինի ու Վրաստանը չպահպանվի, ապա վաղ թե ուշ՝ Վրաստանը տեղի կտա այդ ճնշումներին:
