Հայոց ցեղասպանության ճանաչումը շատ կարևոր է մեր ազգի և միջազգային հանրության համար։ Asia Times-ին տված բացառիկ հարցազրույցում ասել է ՀՀ նախագահ Արմեն Սարգսյանը` անդրադառնալով Հայաստանի արտաքին քաղաքականության առաջնահերթություններին։
«Եթե չես ճանաչում ցեղասպանությունները, դրանք շարունակվում են։ Ինչպես կարող է մեկն ասել, որ Ռուանդայում ցեղասպանություն չի եղել։ Պետք է ընդունել, որ ցեղասպանություն է եղել, հետո մտածել՝ ինչպես կարող ես պարզապես ապրել դրա հետ և փոխել դրա հետևանքները»,– ասել է Սարգսյանը։
Խոսելով տարածաշրջանում իրավիճակի մասին` ՀՀ նախագահը շեշտել է, որ Հայաստանն ունի Թուրքիայի պես հարևան, որի դեպքում դժվար է կանխատեսել, թե որն է լինելու նրա հաջորդ քայլը։
Հայաստանի մեկ այլ հարևանի` Իրանի մասին Սարգսյանն ասել է, որ այդ երկրի հետ հարաբերությունները կենսական և շահեկան են Հայաստանի համար։
«Իրանը երկար տարիներ եղել է մեր վստահելի հարևանը։ Նույնիսկ արևմտյան մեր բարեկամներից շատերն ընդունում են, որ կարող են տարաձայնություններ ու լարվածություն ունենալ Իրանի հետ, բայց Իրան-Հայաստան հարաբերությունները զարգանում են այլ հարթության վրա: Շատ կարևոր է, որ մեր հարաբերությունները առևտրատնտեսական, քաղաքական կամ մշակութային ոլորտներում լինեն խորն ու արդյունավետ։ Պատմությունը ցույց է տալիս, որ մենք կարող ենք վստահել Իրանին և երկարատև հարաբերություններ ունենալ և՛ որպես պետություն, և՛ որպես ազգ»,– ասել է նա։
Նրա դիտարկմամբ, Իրանին ևս երկկողմ հարաբերություններում անհրաժեշտ է ուժեղ ու կայուն Հայաստան։
«Ինչպես գիտեք, մեր զինվորները դեռևս պատանդ են պահվում Ադրբեջանում և չեն վերադարձվել։ Մինչդեռ, բոլոր մարդասիրական արժեքների համաձայն` պատերազմներից հետո տեղի է ունենում բոլոր ռազմագերիների փոխանակման գործընթաց, ինչը փաստացի տեղի ունեցավ այս և 1994 թվականի պատերազմների ժամանակ, երբ Հայաստանը վերադարձրեց բոլոր ադրբեջանցի գերիներին։ Դեռևս կան բազմաթիվ անուններ, որոնց ճակատագրերն անհայտ են, շատ ընտանիքներ չգիտեն՝ իրենց երեխաները, որդիները ո՞ղջ են, թե՞ ոչ»,– ասել է նախագահը:
Արմեն Սարգսյանն արձանագրել է, որ սահմանների հետ կապված խնդիրներ կան նաև Իրանի հետ առևտրի մասով՝ նկատի ունենալով Սյունիքի ճանապարհներին տեղադրված ադրբեջանական հենակետերում Հայաստան մուտք գործող իրանական ավտոմեքենաներից գանձվող վճարները։
Հիշեցնենք, որ ադրբեջանական կողմի` Գորիս–Կապան ճանապարհին նոյեմբերի 11-ից մաքսակետ տեղադրելուց հետո, այժմ շահագործվում է այլընտրանքային ճանապարհ, որն անցնում է Խոտ գյուղով և տանում դեպի Որոտան։ Այդ ճանապարհը, սակայն, ադրբեջանական զինված ծառայողների անմիջական դիտարկման ներքո է։
