Տեղի է ունեցել հեռախոսազրույց Ֆրանսիայի նախագահ Էմանուել Մակրոնի և Ռուսաստանի նախագահ Վլադիմիր Պուտինի միջև, որի ընթացքում խոսվել է նաև արցախյան հարցի մասին: Մակրոնն ու Պուտինը, ըստ Կրեմլի տարածած հաղորդագրության, դրական են գնահատել հումանիտար իրադրության բարելավումը, կայունությունը, խաղաղ կյանքի կարգավորման, տրանսպորտային ապաշրջափակման ուղղությամբ աշխատանքը: Ըստ Կրեմլի հաղորդագրության, Պուտինն ու Մակրոնը նշել են, որ Ռուսաստանն ու Ֆրանսիան այդ հարցերում գործել են և գործելու են սինխրոն:
Մակրոն-Պուտին հեռախոսազրույցը բոլորովին արտառոց չէ, առավել ևս, որ այն հատուկ արցախյան թեմայով չէ: Քննարկվել են տարբեր հարցեր, այդ թվում Ուկրաինական ճգնաժամ, Մալի, և դրանց շարքում նաև արցախյան հարցը: Ավելին, այդ զրույցները տեղի են ունենում պարբերաբար և վերջինը դեկտեմբերի 14-ին էր՝ Բրյուսելում Փաշինյան-Ալիև հանդիպմանը գրեթե զուգահեռ, որ տեղի ունեցավ ԵԽ նախագահ Շարլ Միշելի միջնորդությամբ: Հաջորդեց անսպասելի զարգացում, երբ դեկտեմբերի 15-ին էլ Բրյուսելում եղավ Փաշինյան-Ալիև նոր հանդիպում: Դրանից հետո Ֆրանսիայի նախագահը մի գրառում էր արել Հայաստանի կողքին լինելու և տևական խաղաղություն որոնելու մասին, իսկ հետո հայերեն, ֆրանսերեն և ադրբեջաներեն գրառում, որտեղ դարձյալ խոսել էր խաղաղության մասին: Դատելով Բրյուսելի հանդիպմանը օրեր անց հաջորդած Մակրոն-Պուտին նոր հեռախոսազրույցից, հնարավոր է ենթադրել, որ Բրյուսելում Ֆրանսիայի նախագահի մասնակցությամբ Փաշինյան-Ալիև չհայտարարված հանդիպումը Ռուսաստանի հետ գործողությունների սինքրոնության դրսևորում էր: Այստեղ թերևս իրավիճակը գնահատելու հարցում անհրաժեշտ է դուրս գալ միայն արցախյան, հայ-ադրբեջանական խնդրի տիրույթից, երբ խոսվում է Ռուսաստանի, Ֆրանսիայի և ընդհանրապես Մինսկի խմբի համանախագահ եռյակի ու այլ խոշոր խաղացողների փոխհարաբերության համատեքստում:
Ըստ այդմ, ռուս-ֆրանսիական սինքրոնության հիմքը կարող է լինել ավելի լայն, քան կովկասյան հարցերն ու օրակարգը: Պետք չէ բացառել, որ Մոսկվան ու Փարիզը փորձում են համատեղ ջանքով նպաստել այստեղ իրավիճակի կառավարելիության բարձրացմանը, այդպիսով գուցե նվազեցնելով Թուրքիայի ճկունությունը ուկրաինական ուղղությամբ, որը այսօր վերածվել է աշխահաքաղաքական, աշխարհակարգային գլխավոր հանգրվանի:
