Հայաստանի կառավարությունը նախատեսում է վերականգնել Երասխ-Ջուլֆա-Օրդուբադ-Մեղրի-Հորադիզ երկաթուղու 45 կմ հատվածը մոտ 200 միլիոն դոլարով: Փոխվարչապետ Մհեր Գրիգորյանը նշել է, որ ընդհանուր առմամբ երկաթուղային գծի երկարությունը Հայաստանի տարածքով կկազմի մոտ 45 կիլոմետր, իսկ ճանապարհի ընդհանուր երկարությունը ՝ մոտ 340 կիլոմետր:
Վարչապետ Նիկոլ Փաշինյանն էլ հայտարարել է, որ Ադրբեջանի հետ պայմանավորվածությունները կփոխեն տարածաշրջանի քաղաքական միջավայրը, մյուս կողմից, ըստ նրա, սա էականորեն կփոխի տարածաշրջանի տնտեսական, ներդրումային, իհարկե, նաև քաղաքական և անվտանգային միջավայրը։ Քարտեզագետ Ռուբեն Գալիչյանը ներկայացնում է խորհրդային օրերին Հայաստանի երկաթգծերի ցանցը, ըստ որի՝ հարևան երկրներին միացնող հինգ ուղղություն կար՝ Երևանը Իրանին միացնող Ջուլֆան, որն այժմ փակ է Ջուլֆայից դեպի Մեղրի-Մինջևան, ապա դեպի Հորադիզ-Բաքու շարունակվող գիծը, որն այժմ նույնպես անհասանելի է, Երևան -Գյումրի -Վանաձոր-Բագրատաշեն -Թբիլիսի գիծը, որն աշխատում է: Մյուսը Գյումրիից Կարս գնացող գիծն է, որը նունպես փակ է և Երևանից Սևան-Իջևան-Ղազախ ճանապարհով Բաքու և Ռուսաստան հասնող գիծը, որը ևս փակ է:
Այսպիսով, հինգ երկաթուղային ելքերից այսօր մենք ունենք միայն մեկը, որը մեզ միացնում է Թբիլիսիին։ Գալիչյանի խոսքով՝ այս երկաթուղու վերականգնումը հնարավորություն կտա Երևանից Իրանի Ջուլֆա հասնելու համար 400 կմ գնալու փոխարեն գնացքով գնալ 200 կմ, և Երևանից Իրան տրանսպորտի արժեքն էլ մեկ քառորդ կդառնա, և սա մեր տնտեսության զարգացման համար կարևոր հնարավորություն է։
«Եթե մենք կարողանանք օգտագործել տնտեսական հնարավորությունները, տնտեսությունը սկսի շնչել, ամեն ինչ կկարգավորվի, կյանքի մակարդակը ավելի կլավանա, քաղաքականությունն էլ ավելի հեշտ կլինի վարել։ Ամենակարևորը տնտեսականն է, ինչ խոսք, եթե տնտեսությունդ ուժեղ լինի, խոսք կունենաս ասելու»,-«Առաջին լրատվական»-ի հետ զրույցում ասաց Գալիչյանը։
Նրա խոսքով՝ վերագործարկումն իրականացնելուց հետո պետք է նաև կառուցվեն հավելյալ մաքսակետեր չորս սահմանակետերում, ներկայումս մեկը գործում է, չորսը չի գործում։
«Այսպիսով, Հայաստանը կունենա դեպի արտերկիր գնացող մի քանի ճանապարհի տարբերակներ, որոնցից են դեպի Իրան և Ռուսաստան միացնող երկաթուղիները: Այս նոր կապի միջոցը կնվազեցնի տրանսպորտային գները, շատ տեղերում բեռնատար ավտոմեքենաների փոխարեն օգտագործելով ավելի մատչելի երկաթուղային փոխադրումները: Դրան զուգահեռ կնվազեն ծանր բեռնատարների Հայաստանի մայրուղիներին հասցրած վնասներն ու կնվազեն դրանց պարբերաբար վերանորոգման ծախսերի քանակը»,-ասաց նա:
Ալիևը հայտարարում է, որ իրենք պլանավորում են մինչև 2023 թվականի վերջը ավարտել մինչև Հայաստանի սահմանը հասնող երկաթգծի կառուցումը։ Գալիչյանն իրատեսական չի համարում ժամկետների առումով Ադրբեջանի նշած թվերը, նվազագույնը 2024-25 թթ հնարավոր կլինի ավարտին հասցնել այն։
Անդրադառնալով սահմանագծման և սահմանազատման գործընթացներին, և տեսակետին, որ սահմանազատումը կարող է խնդիրներ բերել Տավուշի մարզում, նա նշեց, որ մասնագետները պետք է որոշեն. «Դա 30-40 տարվա աշխատանք է, մեկ օրում անհնար է իրականացնել, դեռ մեկ-երկու տարում հազիվ կարողանանք հանձնախումբ կյանքի կոչել, որը կզբաղվի այդ հարցերով»,-ընդգծեց Գալիչյանը: