Թուրքիայի արտգործնախարար Մևլութ Չավուշօղլուն հավատում է, որ Վրաստանը կմասնակցի «3+3»-ի հաջորդ հանդիպմանը։ Այս մասին նա հայտարարել Է Իսլամաբադում, Իսլամական համագործակցության կազմակերպության (ԻՀԿ) արտաքին գործերի նախարարների խորհրդի Աֆղանստանում հումանիտար իրավիճակի վերաբերյալ արտահերթ նիստից հետո։
Վրաստանը դեկտեմբերի 10-ին Մոսկվայում կայացած «3+3» ձևաչափով փոխնախարարների մակարդակով հանդիպմանը չի մասնակցել, հաջորդ հանդիպմանը նախատեսվում է անցկացնել Թուրքիայում:
«Վրաստանը չի մասնակցել, բայց մենք նախատեսում ենք հաջորդ հանդիպումն անցկացնել Թուրքիայում եւ հավատում ենք, որ Վրաստանը ևս կմասնակցի այդ հանդիպմանը», – նշել է Չավուշօղլուն:
Հիշեցնենք, որ Ռուսաստանի Դաշնության արտաքին գործերի նախարարության հրավերով դեկտեմբերի 10-ին Մոսկվայում կայացել է տարածաշրջանային խորհրդակցական հարթակի ձևավորմանն ուղղված առաջին հանդիպումը, որին մասնակցել են Հայաստանի, Ռուսաստանի, Իրանի, Ադրբեջանի, Թուրքիայի ներկայացուցիչները՝ ԱԳ նախարարի տեղակալների մակարդակով։
Պայմանավորվածություն է ձեռք բերվել շարունակել խորհրդակցությունները՝ հիմնվելով տարածաշրջանի բոլոր երկրների իրավունքների հարգման և ներգրավման անհրաժեշտության վրա։
«Բազմազգ Վրաստան» նախաձեռնության ղեկավար, վրացահայ մեկնաբան Առնոլդ Ստեփանյանի խոսքերով՝ Վրաստանի համար դժվար է Ռուսաստանի հետ նույն ֆորմատում գտնվել, հատկապես երբ խոսք է գնում տարածաշրջանի բոլոր կոմունիկացիներն ապաշրջափակելու մասին․ «Այսինքն՝ Ռուսաստանն ուղիղ հետաքրքրություն ունի ապաշրջափակել իր կողմից օկուպացված Աբխազիան ու Հարավային Օսիան, ինչը միանշանակ Վրաստանի հետաքրքրությունների շրջանակում չէ։ Իհարկե Վրաստանը շատ դժվարությամբ է դիտարկում իր մասնակցությունը նման ձևաչափում։ Շատ լավ կլիներ, եթե այդ ֆորմատում ընդգրկված լինեին Վրաստանի կայուն գործընկերները՝ ԱՄՆ-ն, Եվրամիությունը, բայց ինչպես տեսնում ենք այդ մասին խոսակցություն չկա»,-«Առաջին լրատվական»-ի հետ զրույցում ասաց նա։
Ստեփանյանի դիտարկմամբ՝ չնայած վերը նշված հանգամանքի, Վրաստանի համար գաղափարը հետաքրքիր է և Թբիլիսին կցանկանար այդպիսի մեծ նախագծի մասնակիցը լինել․ «Բայց միևնույն ժամանակ պետք է խուսափել որոշակի ռիսկերից։ Այնտեղ, որտեղ ձևաչափի հեղինակների կարծիքը կհամընկնի Վրաստանի հետաքրքրությունների հետ, Վրաստանը կարող է մասնակցություն ունենալ, իսկ այնտեղ, որտեղ այդ շահերը չլինեն՝ Վրաստանը չի մասնակցի»։
Ըստ մեր զրուցակցի՝ այդպիսի դիրքերից պետք է հանդես գա ցանկացած երկիր։
Ինչ վերաբերում է այն դիտարկումներին, թե Վրաստանի մերժումը պայմանավորված է այն հանգամանքով, որ այդ երկրում լարված ներքաղաքական իրավիճակ է և հնարավոր է հանդարտեցումից հետո Թբիլիսին փոխի իր դիրքորոշումը, քանի որ քննադատության չի ենթարկվի, Առնոլդ Ստեփանյանն ասաց․«Ես չէի կապի իրար։ Եվ առհասարակ՝ Վրաստանի ներքաղաքական իրավիճակի կրիտիկական։ Չէի ասի նույնիսկ, թե հիմա Վրաստանի պատմության ամենածանր ժամանակներից է, որ ռիսկեր հաշվի առնելով նման որոշում կայացվի։ Իհարկե դժվար է անընդհատ գտնվել նման լարվածության մեջ՝ ոչ միայն քաղաքական խաղացողների, այլ քաղաքացիների համար։ Բայց, նորից եմ կրկնում՝ իրավիճակը ճգնաժամային չէ և այն չի ազդում որոշումների ընդունման հարցում տարածաշրջանային քաղաքականության իմաստով»։
