Վարչապետ Նիկոլ Փաշինյանը որոշում է ստորագրել սահմանադրական բարեփոխումների խորհրդի ձևավորման գործընթաց սկսելու մասին: Ըստ այդմ, խորհրդի կազմում, մասնավորապես, ընդգրկվելու են արդարադատության նախարարը, ՄԻԵԴ-ում ՀՀ ներկայացուցիչը, ՄԻՊ-ը, ԱԺ պետաիրավական հանձնաժողովի նախագահը, մեկական ներկայացուցիչ ԱԺ խմբակցություններից, մեկ ներկայացուցիչ ԲԴԽ-ից, 3 ներկայացուցիչ արտախորհրդարանական ուժերից, երեք ներկայացուցիչ ՀԿ սեկտորից:
«Իրազեկ քաղաքացիների միավորում» ՀԿ-ի ծրագրերի համակարգող Դանիել Իոաննիսյանը «Առաջին լրատվական»-ի հետ զրույցում նշեց, որ այս գործընթացի հետ կապված իրենց կազմակերպությունը ՔՀԱ Վանաձորի գրասենյակի հետ միասին ներկայացրել են որոշակի առաջարկություններ, որոնք համարյա ամբողջությամբ ընդունվել են, և այս փուլում իրենք այս գործընթացը դրական են գնահատել:
«Դեռևս պետք է լինի ՀԿ-ների և արտախորհրդարանական ուժերի ներկայացուցիչների մրցույթը, որը կտեսնենք, թե ինչպես կընթանա: «Իրազեկ քաղաքացիների միավորումը» որոշակի աշխատանք ունի կատարած սահմանադրական բարեփոխումների նախորդ հանձնաժողովում և մենք մտադիր ենք շարունակել մեր աշխատանքը, նաև առաջադրվելու ենք այս նոր հանձնաժողովում»,-ասաց նա:
Իոաննիսյանի խոսքով, բավականին շատ ուղղություններով է աշխատում իրենց կազմակերպությունը, որոնք հիմնականում վերաբերում են քաղաքացիների կողմից իշխանություն իրացնելու մեխանիզմներին. «Դրանք են ընտրությունները, հանրաքվեները, մեխանիզմները, որոնցով պետք է այս կամ այն մարմինը ձևավորվի, ով պետք է մասնակցի այս կամ այն մարմնի ձևավորմանը և այլն:
Մենք որոշ քննարկումներ հասցրեցինք անել նախքան պատերազմը սկսվելը, այդ քննարկումները բավականին լավ էին ընթանում և բավականին շատ հարցերում իշխանությունների հետ եկել ենք փոխադարձ ընկալման: Անազնիվ կլինի ասել, որ վերջնական որոշում կա, բայց օրինակ այն, որ կարող է վերանայվել քվեարկելու իրավունք ստանալու տարիքը, դրա հետ կապված իշխանությունների հետ բավականին փոխըմբռնում ունեինք»,-ասաց Իոաննիսյանը:
Անդրադառնալով կառավարման համակարգի հնարավոր փոփոխությանը, նա ընդգծեց. «Կառավարման համակարգի մոդելի փոփոխման անհրաժեշտության մասին սկսեցին խոսել ճգնաժամի ժամանակ, երբ եղավ ճգնաժամ, որ վարչապետը չէր կարողանում փոխել գլխավոր շտաբի պետին:
Բայց ամենախորը ճգնաժամը, որ կարող է լինել ցանկացած պետության մեջ, գործադիր և օրենսդիր իշխանությունների միջև տարաձայնության ճգնաժամն է: Բարեբախտաբար, Հայաստանում նման ճգնաժամ չի եղել և չի եղել այն պատճառով, որ Հայաստանը խորհրդարանական կառավարման երկիր է: Նման ճգնաժամեր կարող են լինել միայն նախագահական կառավարման երկրներում: Պատճառը շատ պարզ է. խորհրդարանական կառավարման երկիրը հենց նրանով է տարբերվում նախագահական ու կիսանախագահական կառավարման երկրներից, որ խորհրդարանական կառավարման երկրում գործադիր իշխանության ղեկավարը վարչապետն է, ով ընտրվում է խորհրդարանի կողմից: Իսկ նախագահականի կամ կիսանախագահականի դեպքում գործադիրի ղեկավարը նախագահն է, ով առանձին է ընտրվում և կարող է այնպես ստացվել, որ այլ քաղաքական ուժ ներկայացնի, ինչն արդեն ճգնաժամի աղբյուր է»:
Հարցին, թե իր կանխատեսմամբ, երբ պատրաստ կլինեն սահմանադրական փոփոխությունները, նա պատասխանեց. «Ինձ թվում է, լավագույն դեպքում 2,5 տարի հետո»:
