2022 թվականի հունիսին մեկնարկելիք Ազգերի լիգայի խաղարկությունում Հայաստանի ազգային հավաքականը B դիվիզիոնի առաջին ենթախմբում կմրցի Ուկրաինայի, Իռլանդիայի և Շոտլանդիայի հավաքականների հետ։ Ի՞նչպես կարելի է գնահատել նախօրեին տեղի ունեցած վիճակահանության արդյունքները։ Ազգերի լիգայի նախորդ խաղարկությունում Հայաստանի հավաքականը պատմական հաջողություն գրանցելով հաղթեց C դիվիզիոնի ենթախմբում, բարձրանալով ավելի ուժեղ B դիվիզիոն։ Ի գարբերություն Ազգերի լիգայի նախորդ խաղարկության այս անգամ խաղարկվելու են նաև Եվրոպայի 2024 թվականի առաջնության եզրափակիչ փուլի ուղեգրեր։ Նախորդ խաղարկության ընթացքում շատ էր խոսվում, որ մեր հավաքականի համար ուղեգրի համար պայքարը շատ ավելի հեշտ կլինի C դիվիզիոնում և պատմական հաղթանակը մեզ ոչինչ չտվեց։ Հայաստանի ազգային թիմը պատերազմական իրավիճակում Խոակին Կապառոսի գլխավորությամբ ցուցաբերելով կամային բարձր որակներ պայքարեց մինչև վերջ։ Մերոնք առաջնոդրվեցին առողջ մրցակցության և ազնիվ խաղի կանոնների սկզբունքներով ինչն օրինակելի դրսևորում էր։ Եվրոպայի առաջնության եզրափակչում Ազգերի լիգայի միջոցով հայտնվելու համար հիմա մեզ անհրաժեշտ է հաղթել ընտրական ենթախմբում և դուրս գալ փլեյ-օֆֆ։ Այստեղ էլ բավական ուժեղ մրցակիցների հետ դիմակայություններում անհրաժեշտ կլինի հաղթել կիսաեզրափակչում և եզրափակչում։ Ասել, որ սա անլուծելի խնդիր է ճիշտ չի լինի։ Սթափ գնահատելով իրավիճակը, սակայն հասկանում ենք, որ այս ճանապարհով Եվրոպայի առաջնության եզրափակիչ փուլի ողեգրին տիրանալն այնքան էլ իրատեսական չէ։
Չմոռանանք, որ 2023 թվականի մարտից սկսվելու է Եվրոպայի առաջնության հիմնական՝ ընտրական փուլը։ ՀՖՖ-ի նախագահ Արմեն Մելիքբեկյանը այս տարի վարչապետ Նիկոլ Փաշինյանի հետ հանդիպմանը հայտարարել էր, որ մեր հավաքականի առաջ խնդիր է դրված նվաճել 2022 աշխարհի առաջնության կամ 2024 թվականի Եվրոպայի առաջնության ուղեգիր։ «Հայտնվել ենք բավականին ուժեղ խմբում, որտեղ կա թիմ, որն անցյալ տարի հանդես էր գալիս A լիգայում: Այն, որ մենք մրցելու ենք այդպիսի թիմերի դեմ, նշանակում է, որ մենք ևս որոշակիորեն առաջադիմել ենք և ունենք համապատասխան մակարդակ: Մրցակիցները ֆիզիկապես լավ պատրաստված թիմեր են, որոնց կազմում կան նաև տեխնիկական լավ որակներ ունեցող շատ ֆուտբոլիստներ: Մենք պետք է փորձենք մրցունակ լինել և յուրաքանչյուր խաղում պայքարել հաղթանակի համար: Խմբի ֆավորիտը, բնականաբար, Ուկրաինան է, սակայն Իռլանդիան և Շոտլանդիան նույնպես փորձառու և հմուտ թիմեր են»,- ՀՖՖ-ի պաշտոնական կայքին տված հարցազրույցում ասել է Կապառոսը։ Մեր հավաքականի ավագ Հենրիխ Մխիթարյանն իր հերթին մեկնաբանելով վիճակահանության արդյունքը նշել է․ «Կարծում եմ՝ ամենահեշտ խումբը չէ, բայց մեզ կարող էին և ավելի բարդ մրցակիցներ բաժին հասնել: Իռլանդիային շատ լավ ենք ճանաչում և, կարելի է ասել, «շատ լավ» հիշողություններ ունենք: Շոտլանդիայի դեմ առաջին անգամ ենք խաղալու և նույնպես հեշտ չի լինելու:
Ինչ վերաբերում է Ուկրաինայի հավաքականին, 90-ականներին և 2000-ականներին մեր հավաքականը բազմիցս խաղացել է նրանց դեմ՝ անցկացնելով 8 հանդիպում, և չնայած վերջին շրջանում այս թիմի հետ չենք ընդգրկվել միևնույն խմբում, շատ լավ ենք ճանաչում ուկրաինացիներին: Կարծում եմ ու նաև վստահ եմ, որ ունակ ենք պայքարելու այս հավաքականների դեմ և անակնալ մատուցելու նրանց: Եթե կարողանանք պահպանել մեր տեղը B լիգայում, արդեն իսկ վատ արդյունք չի լինի»: Ինչ եզրակացություն կարելի է անել մեր հավաքականի գլխավոր մարզչի և ավագի մեկնաբանություններից։ Թե Կապառոսը և Մխիթարյանը Ազգերի լիգան համարում են պայքարի կարևոր հանգրվան։
Նրանք իրենց մեկնաբանություններում զերծ են մնացել Եվրոպայի առաջնության ուղեգրի մասին խոսելուց, միևնույն ժամանակ դա չհամարելով անիրատեսական։ Սա միանգամայն ճիշտ մոտեցում և գնահատական է։ Արձանագրենք թերևս հետևևյալը․ անկախ արդյունքից Ազգերի լիգան մեր հավաքականի համար պայքարի կարևոր մի փուլ է Եվրոպայի առաջնության եզրափակչում հայտնվելու ճանապարհին։
