Ներկայացումն այնքան էլ չհուսադրեց, որ ինչ-որ բան փոխվելու է, բայց սա գործընթաց է. կարծում եմ՝ ինչ-որ ձևով ազդեցություն կարող ենք ունենալ, քանի որ սա դեռ նախնական փուլն է: Այս մասին «Առաջին լրատվական»-ի հետ զրույցում նշեց բնապահպան, իրավաբան Նազելի Վարդանյանը՝ անդրադառնալով հանքարդյունաբերության ռազմավարության ներկայացմանը:
«Սա շատ կարևոր փաստաթուղթ է, որովհետև ռազմավարությունից պետք է բխեն մնացած բոլոր և պետության գործողությունները, և օրենսդրական փոփոխությունները: Եթե թերի լինի այս փաստաթուղթը, ապա մենք կունենանք ավելի վատ վիճակ, քան այսօր ունենք: Այն, ինչ ներկայացվեց, որ հանքարդյունաբերությունը պետք է պահպանի իր առաջատար դիրքերը, այդքան էլ համաձայն չեմ, որովհետև այսօր առաջատար չէ: Մենք ունենք 1-2 հանք, որ արդյունավետ աշխատում են, այն էլ բավականին մեծ թերություններով, բնությանը մեծ վնասներ պատճռելով, առանց բնակչությանը փոխհատուցելու, առանց սոցիալական ծրագրերի, առանց աշխատողների իրավունքների պահպանության»,-ասաց նա:
