Հայաստանն ու Թուրքիան հայտարարել են, որ հարաբերությունները կարգավորելու հարցերով զբաղվող հատուկ ներկայացուցիչներ են նշանակելու: Հայաստանը հայտարարել է, որ ինչպես նախկինում, հիմա էլ պատրաստ է Թուրքիայի հետ առանց նախապայմանների հարաբերություններ հաստատելու գործընթաց սկսել։
Անկարան Հայաստանի հետ հարաբերությունների կարգավորման համար հատուկ ներկայացուցիչ կնշանակի Վաշինգտոնում Թուրքիայի նախկին դեսպան Սերդար Քըլըչին, Հայաստանի հատուկ ներկայացուցչի անունը դեռ հայտնի չէ, մամուլում շրջանառվում է ԱԺ փոխնախագահ Ռուբեն Ռուբինյանի անունը։
Հայաստան-Թուրքիա հարաբերությունների հաստատման վերաբերյալ վերջին զարգացումները սփյուռքում ավանդական կուսակցությունների շրջանում մտահոգություններ չի առաջացրել։
Այս առնչությամբ Սոցիալ Հնչակյան կուսակցության Կենտրոնական վարչության քարտուղար, լիբանանաբնակ Ալեքսան Քէօշկէրեանը «Առաջին լրատվական»-ի հետ զրույցում նշեց, որ հայ-թուրքական հարաբերությունների բարելավումը պետք է լինի առանց որևէ պայմանի. «Հայաստանը տնտեսապես պետք է ինքն իրեն պաշտպանի, այնպես որ Թուրքիայի տնտեսությունը կուլ չտա մեր ազգային տնտեսությունը, և մենք չպետք է հրաժարվենք Հայ դատի մեր որևէ պահանջից, դա լինի Հայոց ցեղասպանության հարց, լինի Ղարաբաղի հարց: Այդ դեպքում, այո, երկու հարևան երկրների հարաբերությունները ինչ-որ ժամանակ պետք է կարգավորվեն: Բայց կրկին շեշտում եմ, որ դա պետք է արվի բոլոր ռիսկերը հաշվի առնելով և ոչ հայկական իրավունքներից որևէ մեկի հաշվին:
Դրա համար էլ այս պրոցեսը 1-2 օրվա մեջ չի հաջողվի, պետք է ժամանակ անցնի: Բանագնացները կնշանակվեն, բայց մինչև հարաբերությունների վերջնական բնականոնացումը մենք պետք է ամրապնդվենք տնտեսապես, ֆիզիկապես, ինչու չէ նաև մեր բանակով և ամեն ինչով»,-ասաց նա:
Հարցին, թե ինչպե՞ս է գնահատում, որ այդ հարցով Թուրքիայի կողմից բանագնաց է ներկայացվել Վաշինգտոնում Թուրքիայի նախկին դեսպանը, Քեօշկէրեանը պատասխանեց. «Ճիշտն ասած, ես չեմ ճանաչում այդ անձին, ոչ էլ իր գործունեությանն եմ ծանոթ: Սակայն հատկանշական է, որ ԱՄՆ-ում Թուրքիայի դեսպանը նշանակվում է բանագնաց, սա ինչ-որ տեղ ցույց է տալիս Ամերիկայի օրհնությունն այս հարցի վերաբերյալ, որն արտահայտել են արդեն իրենք՝ ասելով, որ Հայաստանի և Թուրքիայի հարաբերությունների բնականոնացումը պետք է լինի: Ինչպես նաև Ռուսաստանի ԱԳՆ-ն է հայտարարել: Այսինքն այս հարցը, ինչ-որ տեղ դուրս է եկել Հայաստանի իշխանությունների կամքից: Երբ այսպիսի հզոր պետություններ հովանավորում են այդ գործընթացը, դա նշանակում է, որ ինչ-որ տեղ վերևներից էլ ճնշումներ կան: Ես ճնշում բառը չակերտներում եմ օգտագործում, կարծում եմ՝ ԱՄՆ-ն էլ, Ֆրանսիան է, ԵՄ-ն էլ, Ռուսաստանն էլ հորդորում են գնալ այդ քայլին»:
Նույն խնդրի առնչությամբ ՌԱԿ պատվո ատենապետ Սարգիս Խաչատուրյանն ասաց. «Մենք բնավ չենք ուզում գործակցել թուրքերի հետ այստեղ, բայց եթե Հայաստանում ինչ-որ բան կա, և պետք է լինի, իրոք Հայաստանի բոլոր քայլերին ի նպաստ ենք: Հայաստանն ինչ էլ ասի, մենք համաձայն ենք: Մենք հայրենիքի կողքին ենք, ինչ-որ ասի հայրենիքը, մենք իր հետ ենք Մենք ինչ կարողանում ենք անել հայրենիքի համար, անում ենք և ուզում ենք բոլոր ձևերով միասնաբար համագործակցել Հայաստանի հետ»:
Ինչ վերաբերում է Հայաստանում տեղի ունեցող զարգացումներին, մասնավորապես, Սյունիքում, Հայաստանի սահմաններին, նաև Արցախի շուրջ, Սարգիս Խաչատուրյանն ասաց. «Ինչը հայրենիքին ի նպաստ է, մենք այնտեղ ենք: Արցախի խնդրում նույնպես մենք համաձայն ենք հայրենիքի հետ, մենք հայրենիքի դեմ չենք գործում»: