ՀՀ ԶՈւ ԳՇ նախկին պետ, գեներալ-գնդապետ Յուրի Խաչատուրովը և ՀՀ ԶՈւ ԳՇ նախկին պետ, գեներալ-լեյտենանտ Նորատ Տեր-Գրիգորյանցը երաշխավորություն են ներկայացրել արցախյան պատերազմների մասնակից, «Սիսական» ջոկատի հրամանատար, գնդապետ Աշոտ Մինասյանի («Աշոտ Երկաթ») համար. տեղեկանում ենք «Աշոտ Մինասյանի պաշտպանության խորհրդից։
«Մենք՝ ներքոստորագրյալ գեներալներս, անձնապես ճանաչում ենք Աշոտ Մինասյանին, քաջատեղյակ ենք նրա անցած հերոսական ուղուն և հավաստիացնում ենք, որ վերջինս երբևիցե անօրինական գործողությունների չի դիմել և չի դիմի: Վստահաբար երաշխավորում ենք, որ Աշոտ Մինասյանը չի թաքնվի, չի խոչընդոտի քննության ընթացքին և չի կատարի օրենքով արգելված որևէ արարք»,–ասված է Յուրի Խաչատուրովի և Նորատ Տեր-Գրիգորյանցի հայտարարության մեջ։
«Առաջին լրատվական»-ի հետ զրույցում Նորատ Տեր Գրիգորյանցը հաստատեց, որ նման երաշխավորություն է ներկայացրել։Գեներալը մասնավորապես նշեց․«Դուք հարցրեցիք ես սկզբում հանկարծակիի եկա, բայց հիշեցի, որ այո՛, նման բան եղել է։Այյո․ ես նրա համար երաշխավորություն ներկայացրել եմ»։
Նորատ Տեր-Գրիգորյանցից հետաքրքրվեցինք ՝նախկինում երբեք նման միջնորդություն կամ երաշխավորություն ինքը չի ներկայացրել, ինչու՞ հանկարծ որոշեց դա անել Աշոտ Մինասյանի համար․«Ես կարող եմ ասել, որ ինքը հայրենասեր մարդ է, իր վրա կարելի էր հույս դնել, դրա համար էլ նման քայլի գնացինք։ Ընդհանուր մթնոլորտը բերեց այն մտքի, որ պետք է ստորագրենք ու երաշխավորենք նրա համար։ Զուտ այդ տեսակետից եմ նայում ՝մարդկային, հումանիտար․․․ Հուսով եմ, որ երբ այս ամենը մնա անցյալում, ինքը կշարունակի իր հայրենասեր գործունեությունը։ Ուզում եմ ասել, որ ինքը շատ արժանիքներ ունի և պետք է չէ այդ արժանիքները սպանել։Ես այդ տեսակետից եմ հարցին մոտենում»,-եզրափակեց գեներալը։